М.ЦЭЦЭГ

Сангийн сайд Ч.Улаан, Эдийн засгийн хөгжлийн сайд Н.Батбаяр нарыг үүрэгт ажлаас нь огцруулах санал, УИХ-ын тогтоолын төслүүдийг  УИХ дахь МАН-ын бүлгийнхэн санаачилж уржигдар УИХ-ын дарга З.Энхболдод өргөн барьсан. Энэ асуудлыг өчигдөр УИХ дахь МАХН-МҮАН-ын “Шударга ёс” эвслийн бүлгийнхэн хэлэлцлээ. Бүлгийн хуралдаанд огцруулахаар ярьж буй хоёр сайдыг байлцуулав. Мөн Ерөнхий сайд Н.Алтанхуягийг ч бүлгийн хуралдаанд дуудаж оролцуулсан юм. Хоёр сайдыг ямар шалтгаанаар огцруулахаар сөрөг хүчин УИХ-ын удирдлагад хандсан шалтгааныг тодруулсан бололтой.

МАН-ын бүлгийн мэ­­дээлснээр эрх ба­риг­чид Засгийн эрх авснаас хойш цалин тэтгэвэр, тэтгэмжийг нэмэгдүүлэх талаар ямар ч арга хэмжээ авсангүй, төгрөгийн ам.доллартай харьцах ханш 30 орчим хувиар суларлаа. Өргөн хэрэглээний бараа, бүтээгдэхүүний үнэ бодит амьдрал дээр 30 орчим хувь өсөж, улмаар иргэдийн худалдан авах чадвар эрс муудаж, ард иргэдийн амьдралд хүндээр тусаж байна.

Чанаргүй зээл өнгөрсөн арваннэгдүгээр сарын эцэст 572.5 тэрбум төгрөг болж, өмнөх оны мөн үеийнхээс 274 тэрбум төгрөг буюу 91.8 хувиар өссөнөөр илэрхийлэгдэж байна. Энэ нь дээрх сайдуудыг огцруулах үндэслэл болж байна гэдгийг УИХ дахь МАН-ын бүлгийнхэн онцолж буй.

Гэвч энэ талаар “Шударга ёс” эвслийн бүлгийнхэн хэлэлцээд хоёр сайдыг огцруулах шаардлагагүй гэж үзлээ. Мөн АН-ын бүлгийнхэн энэ тухай хэлэлцсэн байна.  Асуудлыг энэ долоо хоногт  байнгын хороо болон чуулганы нэгдсэн хуралдаанаар үргэлжлүүлэн хэлэлцэх төлөвтэй байна.