Д.БОЛОР

МАН-ынхан Сангийн сайд Ч.Улаан, Эдийн засгийн хөгжлийн сайд Н.Батбаяр нарыг огцруулах тухай тогтоолын төслийг УИХ-ын даргад өргөн барилаа. Энэ тухай УИХ дахь МАН-ын бүлгийн дарга С.Бямбацогт “Бид намын XXVII Их хурлын дараа 21 аймаг, есөн дүүрэгт очиж ажиллаж, ард иргэдийнхээ санаа бодлыг сонслоо. Ард түмний амьдрал хүнд байна. Энэ бол яах аргагүй Засгийн газрын үйл ажиллагаатай холбоотой. Тиймээс эхний ээлжинд эдийн засаг, төсвийн асуудал хариуцсан сайдуудад хариуцлага тооцно. Иргэдийн санаа бодлыг сонсож хариуцлагагүй ажиллаж буй сайд нарт цаашдаа хариуцлага тоо­цох асуудлыг ярина” гэв.

Эрх баригчид Засгийн эрх авсанаас хойш цалин тэтгэвэр, тэтгэмжийг нэмэгдүүлэх талаар ямар ч арга хэмжээ авсангүй, төгрөгийн ам.доллартай харьцах ханш 30 орчим хувиар суларлаа. Өргөн хэрэглээний бараа, бүтээгдэхүүний үнэ бодит амьдрал дээр 30 орчим хувь өсөж, улмаар иргэдийн худалдан авах чадвар эрс муудаж, ард иргэдийн амьдралд хүндээр тусаж байна. Чанаргүй зээл 2013 оны арваннэгдүгээр сарын эцэст 572.5 тэрбум төгрөг болж, өмнөх оны мөн үеийнхээс 274 тэрбум төгрөг буюу 91.8 хувиар өссөнөөр илэрхийлэгдэж байна. Энэ нь дээрх сайдуудыг огцруулах үндэслэл болж байгааг тогтоолын төсөл санаачлагчид хэллээ.  Сангийн сайд Ч.Улаан, Эдийн засгийн хөгжлийн сайд Н.Батбаяр нарыг огцруулах тухай тогтоолын төсөлд нэр бүхий 26 гишүүн санал нэгдэн гарын үсэг зурсан байна.