Д.БОЛОР

УИХ-ын Хууль зүйн байнгын хорооны хуралдаанаар өчигдөр  Хохирлыг эргэн төлөгдөх нөхцлөөр барагдуулах тухай хуульд нэмэлт, өөрчлөлт оруулах тухай хуулийн төслийг хэлэлцлээ. Байнгын хорооны хуралдаанд оролцсон гишүүд уг хуулийн төслийг дэмжиж байсан бол гишүүн Ө.Энхтүвшин асуудалд шүүмжлэлтэй хандаж байлаа.Байнгын хорооны хуралдааныг тоймлов.  

Ө.Энхтүвшин:

-Хадгаламж зээлийн хоршоотой УИХ-ын гишүүд нэр холбогддог.  Хоршооны хохирогчдын зүгээс УИХ-ын гишүүдийг нэр заан тэр, тэр мөнгө авсан гэж хэвлэлийн бага хурал хийсэн. “Баян-Өндөр сан” гэж ямар хадгаламж зээлийн хоршоо байсныг мэдэхгүй. Ямар ч байсан эзэн нь Самбалхүндэв гэж хүн байдаг гэсэн.  Түүнээс 50 мянган төгрөг авсан гэж хэлээд байгаа. Тэгэхдээ өнөөх 50 мянган төгрөгөө бас хуваасан тухай хохирогчид хэлдэг. Энэ асуудалд холбогдсон УИХ-ын гишүүний нэрийг зарлаач ээ гэж би Хууль зүйн сайд Х.Тэмүүжинд олон удаа хэлсэн ч инээгээд л яваад байх юм. Энэ асуудлыг шийдээгүй байж, УИХ-аас Хохирлыг эргэн төлөгдөх нөхцөлөөр барагдуулах тухай хуулийн төслийг баталсан нөхцөлд олон нийтийн дунд “Улстөрчид татвар төлөгчдийн мөнгөөр хохирлоо барагдуулаад авчихлаа. Эсвэл ашиг сонирхолдоо нийцүүлээд хууль баталчихлаа” гэх буруу ойлголт төрүүлнэ.  Улстөрчид мөнгө авсан юм бол түүнийгээ ил болгож зарласны дараа асуудлыг хэлэлцэх ёстой.

Ц.Оюунбаатар:

-Ө.Энхтүвшин гишүүнтэй санал нэг байна.  Арилжааны банкууд дампуурахад татвар төлөгчдийн мөнгөөр хохирлыг барагдуулдаг.  Хадгаламж зээлийн хоршоодод мөнгөө алдчихсан иргэдээ болохоор асуудлыг нь шийдэхгүй хойшлуулаад явж болохгүй. Цаана нь хүний эрхийн асуудал байгаа. Төрийн буруутай үйл ажиллагаанаас болоод иргэд хохирчихсон байдаг.  “Гэр хорооллын барилгажилт” хадгаламж зээлийн хоршоо дампуураагүй байхад дампуурсан гэж зарласан байх жишээтэй. Үүнээс болж ноцтой асуудлууд үүссэн. Тус хоршооны эзэмшилд байсан газрыг зарахад өөрсдийнх нь үнэлснээс хоёр дахин өндөр үнэ хүрсэн байдаг. Хэд, хэдэн лиценз байсныг нь  хууль хяналтын байгууллагынхан хурааж авсан нэрийн дор алга болгосон.

О.Баасанхүү:

-Шүүхийн шийдвэрийнхэн ажиллаж чадаж байгаа юм уу. Ажлаа хийж чадахгүй бусад руу нялцаах хэрэггүй. Тэднийг хангалтгүй ажиллаж байна гэж хэлэх байна.  Хадгаламж зээлийн хоршооны хохирогчдын хохирлыг барагдуулах асуудлыг УИХ-д оруулж ирэх шаардлага Засгийн газарт байгаагүй. Хууль зүйн сайд нь шийдвэрээ гаргаад зохицуулж болно асуудал. Болдоггүй юм бол Засгийн газар тогтоол гаргаад шийдчих бололцоотой байхад асуудлыг УИХ руу оруулж ирсэн нь зохисгүй гэв. 

Эцэст нь энэ хуулийн төслийг  УИХ-ын чуулганы нэгдсэн хуралдаанд оруулж хэлэлцэх нь зүйтэй гэдэгт гишүүд санал нэгдсэн юм.  Ер нь хохирогчдын хохирлыг барагдуулахад 36.1 тэрбум төгрөг шаардлагатай байгаа юм байна.

Хохирлыг эргэн төлөгдөх нөхцөлөөр барагдуулах тухай хуульд нэмэлт, өөрчлөлт оруулах тухай хуулийн төслийг УИХ-ын чуулганы өнөөдрийн нэгдсэн хуралдаанаар хэлэлцэнэ.