М.ЦЭЦЭГ

УИХ-ын гишүүн Ж.Батзанданг Тагнуулын ерөнхий газрын машинтай хэдэн хүн дагаж, тагнасан тухай тэрээр цахим хуудсаар жиргэсэн. Чухам юу болсныг эрхэм гишүүнээс тодруулав.

-Таныг Тагнуулын ерөнхий газраас дагаж, мөрдсөн тухай мэдээлэл байна. Энэ тухай тодорхой мэдээлэл өгнө үү?

-Нэг их сүртэй зүйл болоогүй. Өнгөрсөн баасан гаригаас бямба гаригт шилжих шөнө Тагнуулын ерөнхий газрын УБЦ 08-26 дугаартай машин намайг дагасан. Машин дотор дөрвөн хүн сууж явсан.

-Дагаж байгааг нь та яаж мэдсэн юм бэ?

-Машин дагаад байна гэж манай жолооч сэжиг авсан. Эхэндээ би Тагнуулын машин гэдгийг мэдээгүй. Ингээд Замын цагдаагийн газарт бичиг явуулж УБЦ 08-26 дугаартай машин хаанахын машин болохыг тодруулж өгөхийг хүссэн. Тэгтэл Тагнуулын ерөнхий газрын автобаазын машин гэсэн баримт гаргаж өгсөн. Тагнуулын ерөнхий газар нь жуулчны гудамжинд байрладаг гэсэн мэдээлэл ч гаргаж өглөө.

-Та энэ талаар Тагнуулын ерөнхий газрын даргаас лавласан уу?

-Дарга нь ийм дугаартай машин манайд байхгүй гэсэн мэдээллийг надад өгсөн.

-Энэ асуудлыг цаашид яаж шийдэх вэ?

-Ерөнхий сайдад ийм асуудал болсныг дуулгаж, албан ёсоор хандлаа. Шалгаж өгөхийг хүссэн. Тагнуулынхан маань үндэсний аюулгүй байдлын үүднээс намайг хамгаалах гэж явсан байж магадгүй. Тэгвэл баярлалаа.

-УИХ-ын гишүүнийг дагаж, тагнаж болдог юм уу?

-УИХ-ын гишүүн болон иргэнийг зөвхөн гэмт хэрэг үйлдсэн тохиолдолд Гүйцэтгэх ажлын хуулийн хүрээнд шүүх, прокурорын зөвшөөрлөөр дагаж, мөрдөж, чагнаж болдог. Гэмт хэрэгт холбогдоогүй иргэн, гишүүнийг тагнасан бол ноцтой асуудал. УИХ-ын гишүүнийг дагаж мөрдөж байгаа юм чинь жирийн иргэнийг яадаг бол. Цаашид илүү тодруулж дэлгэрэнгүй мэдээлэл өгнө. Надад айх зүйл алга.

-Таны утсыг чагнасан болов уу?

-Утас чагнасан эсэхийг би мэдэх боломжгүй.