М.ЦЭЦЭГ

Үнэхээр тэвчээр алдлаа. Ерөнхий сайдын задгай үг яриатай олон нийт аргагүйн эрхэнд эвлэрдэг болсон гэсэн. Гэвч сэтгүүлчид бид пүрэв гариг бүр түүнд загнуулсаар залхдаг болов. Долоо хоног бүр загнуулсаар тэвчээр алдчихлаа. Ерөнхий сайд Н.Алтанхуяг “Сэтгүүлчидтэй уулзах 30 минут” нэртэй хэвлэлийн бага хурал хийдэг болсон. Өмнөх Ерөнхий сайд нараас ялгарч хэвлэлийнхэнтэй илүү ойр ажиллах нь гэж эхэндээ олзуурхаж байв. Бид ч хүссэн асуултдаа боломжийн хэмжээний хариулт авахыг хичээдэг байлаа. Эхэндээ 30 минутын хугацаа  багадаж байв. Хоёр, гурван уулзалтын дараа 30 минут  ихдэж, долоо хоног бүр дэндүү ойрхон болж Ерөнхий сайдаас залхдаг болов. Ажлаа байнга тайлагнаж, сэтгүүлчдэд нээлттэй болсон нь сайн хэрэг ч дэндүү задгай байх нь хэтэрхий ёс зүйгүй мэт. Сэтгүүлчдийн асуултад зохисон хариултыг нь өгөөд өнгөрдөг бол яая гэх билээ. Үгүй шүү. Н.Алтанхуяг ёжтой ярина. Доромжлоод, тохуурхаад, загнаж зандраад байгаа юм уу, эсвэл тийм мэдэн будилаач хүн үү. Олны өмнө ийм имижтэй байх ёстой ч юм уу, үгүй ч юм уу. Угийн адгуу зантай хүн үү, бүү мэд.

Сэтгүүлч түүнээс “Цагаан будааны үнэ 3000 төгрөгт хүрчихлээ, одоо яах вэ?” гэхээр хариуд нь “Тэгвэл гурилаа л идчихгүй юү” гэж доогтой хариулна. Дараагийн уулзалт дээр нь “Гурилын үнэ бас өсчихжээ” гэхээр “Тэгвэл арвайн гурилаа л идчихгүй юү. Гоё шүү дээ. Би л лав идэж л орхино” гэж хариулна. Өргөн хэрэглээний барааны үнэ нэмэгдээд иргэд туйлдлаа, Засгийн газрын тэргүүн үүнд ямар санаа бодолтой байгаа болоод цаашид ямар арга хэмжээ авах гэж байгааг нь лавлаж байгаа нь тэр. Гэтэл Ерөнхий сайдын хариу ийм.

Өчигдөр болсон 30 минутын уулзалтын үеэр сэтгүүлчид “Төмөр зам тавих өртгийн хэмжээ баталсан төсвөөсөө хоёр дахин нэмэгдэхээр болсон гэсэн үнэн үү”, “Таныг комик ном хэвлүүлэх ажлыг тендергүй явуулсан гээд хэдэн хүн шүүхэд өгөх гэж байгаа тухай мэдээллээ. Яагаад хууль зөрчсөн тухайгаа тайлбарлаач” гэх мэтийн асуулт тавив. Ерөнхий сайд мөн л зандруу “Зүгээр ч ном биш, зураган ном байхаар нь дэмжчихсэн. Би тендер, мендер мэдэхгүй. Оюуны өмчид тендер зарладаггүй. Шүүх дээр очсон гэсэн. Хууль зөрчих яах вэ, юм л хийж байвал” гэв. Ер нь Ерөнхий сайд “Би мэдэхгүй, дуулаагүй, сонсоогүй” гэсэн хариултыг олонтаа хэлдэг болсон. Ерөнхий сайд гэхээрээ л бүгдийг мэддэг, чаддаг, сонссон байх албагүй л дээ. Мэддэг байлаа ч бүгдийг тоочиж болдоггүй байх. Гэхдээ ингэж зандарч суухын оронд мэддэг, чаддаг хүнээр нь хариулт өгүүлбэл яасан юм. Ерөнхий сайдаас үнэхээр залхаж байна.