Төрийн байгуулалтын байнгын хорооны өчигдрийн  хуралдаанаар Р.Амаржаргал гишүүн өөрийнхөө гаргасан хүсэлтийг хэлэлцэхийг хүслээ. Тэрээр УИХ-ын гишүүнээс түдгэлзэх хүсэлт гаргаад байгаа билээ. Энэ тухай гишүүд юу хэлснийг тоймлов.

Р.Амаржаргал:

-УИХ-ын гишүүнээс чөлөөлөгдөх талаар гаргасан миний хүсэлтийг ямар шалтгаанаар хэлэлцэхгүй байна вэ. Энэ асуудлыг байнгын хорооны хэлэлцэх асуудлын дараалалд оруулж өгөхийг хүсье.

А.Бакей:

-УИХ-аар тухайн долоо хоногт хэлэлцэх асуудлыг даргын зөвлөлийн хурлаар хэлэлцэж баталдаг. Таны өргөдлийг хэлэлцүүлэх саналаа зөвлөлийн хуралд хэлсэн. Гэвч одоохондоо болоогүй байна гээд төлөвлөгөөнд оруулаагүй, гэхдээ ойрын үед хэлэлцэх байх. Та АН-аас нэр дэвшиж сонгогдсон гишүүн, олны итгэл хүлээлгэсэн мандат байгаа учраас энэ хүсэлтээ сайтар тунгаан бодох болов уу гэсэн үүднээс зохих хугацаа өгч байгаа гэж ойлгож болох юм. Ер нь УИХ-ын гишүүнээс чөлөөлөгдөх асуудлыг байнгын хороо, чуулганы нэгдсэн хуралдаанаар хэлэлцэх хугацаа заасан зохицуулалт хуульд байхгүй.

Н.Батцэрэг:

-Хэдийгээр хуульд заасан цаг хугацааны зохицуулалт байхгүй ч гэсэн ийм асуудлыг түргэн шийдэж байсан жишээ бий. Иргэн хүн УИХ-ын гишүүнээр сонгогдох, бас өөрийн хүсэлтээр гарах эрхтэй. Намын бүлэг энэ асуудалд таагүй хандаад байх хэрэггүй юм.

Д.Эрдэнэбат:

-Төрд орж ирэх, гарч явах нь хариуцлагатай, бас нэр төртэй холбоотой асуудал. Нэгэнт энэ асуудал даргын зөвлөлийн хурлаар хэлэлцэж баталсан төлөвлөгөөнд ороогүй учраас ирэх долоо хоногийн төлөвлөгөөнд албан ёсоор оруулж байж хэлэлцэх нь зүйтэй гэсэн байр суурьтай байна гэв.

Ингээд УИХ-ын гишүүн Р.Амаржаргалын хүсэлтийг хэлэлцэх асуудлын дараалалд оруулах эсэх талаар санал хураалгахад байнгын хорооны хуралдаанд оролцсон гишүүдийн олонх нь дэмжсэнгүй.