М.ЦЭЦЭГ

УИХ дахь бие даагч гишүүдийн зөвлөл өчигдөр  ээлжит мэдээллээ хийж, УИХ-аар энэ долоо хоногт хэлэлцэх асуудлын талаар байр сууриа илэрхийллээ.  УИХ-ын гишүүн Ц.Даваасүрэн “Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулахаар болсон байна. Бид хуулийн төсөл санаачлагч Ж.Батзандан, О.Баасанхүү нартай адил байр суурьтай байгаа. ҮАБЗ-д ажиллаж байсан хүн гадаадын компанид ажиллаж болохгүй гэсэн заалтыг О.Баасанхүү гишүүн оруулжээ. Энэ маш зүйтэй. Оюутолгойн гэрээ хэлэлцэж байх үед төрийн өндөр алба хашиж байсан хүмүүс “Дэлхийн өсөлт” гэж компани байгуулаад, гадаадын санхүүжилтээр ард түмний тархийг угаах ажилд оролцсон. Одоо тэр компани байхгүй. Мөн оффшор бүсэд данс нээх тухай асуудлыг хөндсөн байна. Төрийн албанд ажиллаж байсан хүн ажилласан хугацаанаасаа хоёр жилийн дотор оффшор бүсэд данс нээхгүй байх, гаднын компанитай хамт хөрөнгө оруулалт хийхгүй байх гэсэн зүйлийг Ж.Батзандан гишүүн санаачилсныг дэмжиж байна” гэв.

 Алтны худалдаанд ил тод байдлыг бүрдүүлэх тухай хуулийн төслийг энэ долоо хоногт үргэлжлүүлэн хэлэлцэнэ. Энэ төслийг бие даагч гишүүд дэмжихгүй байгаа. Энэ жил Оюутолгой 28 тонн алт экспортолно. Дэлхийн зах зээлд нэг кг алт 50 мянган ам.доллар байгаа гэж үзвэл таван хувь нь 75 сая ам.доллар болох юм. Энэ жил бид Оюутолгойгоос 164 тэрбум буюу 94 сая ам.доллар оруулахаар төлөвлөж байгаа. Бид нөөц ашигласны төлбөрийнхөө 40 хувийг чөлөөлөөд өгвөл 37 тэрбум төгрөг болж байна. Тиймээс  алтны роялтигийн таван хувийг хөнгөлөх асуудалд тус зөвлөл эсрэг байр суурьтай байна. Хэрэв хөнгөлчихвөл ирэх жил Оюутолгойгоос авах 94 сая ам.долларынхаа 34 саяыг нь буцааж өгөх болчихоод байна гэдгийг гишүүд онцлов.