М.ГАН

Парламентын ээлжит дуулиан ирэх оны төсвийн хууль болох нь. Ардын намын бүлэг өчигдөр нэлээд сунжирч хуралдсаны эцэст Монгол Улсын 2014 оны төсвийн тухай хуульд ноцтой алдаа гарсныг олж мэджээ. Засгийн газраас төсвийн төслийг өргөн барихдаа ДНБ-д эзлэх өрийн хэмжээ 60 хувь байхаар тооцсон. Гэтэл Төсвийн тогтвортой байдлын тухай хуульд 40 хувиас хэтрүүлэхгүй байхаар заажээ.

Төсвийн хэлэлцүүлгийн үеэр өрийн хэмжээг УИХ дахь нам, эвслийн бүлэг нэлээд хэлэлцэн саналын зөрүүтэй байсан ч хуулийн дагуу 40 хувиас хэтрүүлэхгүй байхаар баталсан. Гэвч ирэх оны төсвийн хуулийн эцсийн найруулгад 60 хувь нь хэвээр байгаа нь Ардын намынхны хардлагыг төрүүллээ. Бүлгийн гишүүд УИХ-ын чуулган, байнгын хорооны хуралдаан зохион байгуулах албаны дарга болон Төсвийн байнгын хорооны ажлын албаны даргыг дуудаж асуусан ч тэд тодорхой хариу өгөөгүй бололтой. Иймд УИХ-ын удирдлага хуулийг санаатай зассан эсвэл Тамгын газрынхан санамсаргүй алдаа гаргасан эсэхийг тодруулахаар болов. Хэрэв хуулийг санаатай зассан бол хариуцлага тооцох ёстой гэж УИХ дахь МАН-ын бүлгийн дарга Н.Энхболд мэдэгдэв.