М.ЦЭЦЭГ

Шинэ дарга, удирдах бүрэлдэхүүнтэй болсон гэх Ардын намынхан дунд шатныхаа бүтцэд өөрчлөлт, халаа, сэлгээ хийж эхэлжээ. Өнгөрсөн баасан гаригт тус намын Удирдах зөвлөл шинэ бүрэлдэхүүнээрээ хуралдаж зарим томилгоог хийсэн байна. Тухайлбал, МАН-ын Хэвлэл мэдээлэл, олон нийттэй харилцах хэлтсийн даргаар Н.Дэмбэрэлийг томилжээ. Тэрээр өмнө нь Засгийн газрын Хэвлэл мэдээллийн албаны даргаар ажиллаж байсан бөгөөд М.Энхболдын пи-арын багт ажилладаг байжээ.

Н.Дэмбэрэлийг эс тооцвол бусад хэлтсийн дарга нь энэ удаад суудалдаа үлдсэн юм байх. Тухайлбал, Ш.Раднаасэд, С.Чинзориг нарын өмнөх удирдлагын багт ажиллаж байсан хүмүүс суудалдаа үлджээ. Тус намын дунд шатны бүтэц Засгийн газрын бүтэцтэй төстэй хэлбэрээр ажиллахаар болж нэлээд цомхон болж байгаа гэнэ. 

Үүнээс гадна УИХ дахь МАН-ын бүлгийн Ажлын албаны зөвлөх Б.Лхагважав ажлаасаа гарахаар болжээ. Тэрээр өөрийн хүсэлтээр зөв­лөхийн ажлаа өгч буйгаа мэдэгдсэн байна. Тэрээр өөрийн багаа бүрдүүлж ажиллах гэж буй намын даргадаа гай бололгүй эртхэн зайгаа тавьж өгч, түүнд ажиллах нөхцөл боломж олгох ёстой гэсэн утгатай зүйл ярьжээ. Гэхдээ Б.Лхаг­важав ажлаасаа албан ёсоор түтгэлзээгүй байгаа аж.

Ийнхүү МАН-ын шинэ удирдлагуудыг дагасан томилгоо, халаа, сэлгээ цаашид ч үргэлжлэх бололтой.