Ч.САНСАР

Ардчилсан нам төр, засгийн эрхийг бариад аятайхан болгох нь уу гэтэл арай биш ээ. Ажлаа хүлээж аваад баахан хүнийг намаар ялгаварлаж гудамжинд гаргасан. Бусдын эрхэнд халдаж, байшин барилга нурааж, заримыг нь хурааж, иргэдээ машины дугаараар  мөн ялгаварлаж байгаа. Өмчинд халдаад ирэхээр юу болдогийг энэ нам эрх биш  мэдэж байгаа байх. Ардчиллынхаа үнэт зүйлсийг алга болгож, либерал үзлээ гээж, эцэстээ коммунист дэглэм тогтоох замдаа шуударч байх шиг.

Сүүлийн үед аль арваад жилийн өмнө хувьчлагдсан арван цэцэрлэгийг буцааж авна хэмээн орой болгон телевизээр үзүүлдэг болов. Зориулалтыг нь өөрчилж, зочид буудал, баар, дэлгүүр болгосон гээд л шогширч байна. Цэцэрлэгийн барилгыг хувьчилж аваад нурааж  өндөр гэгч нь шилэн барилга босгосон нэгэн ч бий гэв. Тэдгээрийг өрсөлдөгч намынх нь гишүүд л авсан, АН-ынхан ариун цагаан гэнэ. Өмчид  ийнхүү халдах болсон нь улсын төсөв “цоорч”, эдийн засаг хүндэрснээс бүтээн байгуулалтын зарим ажлаа зогсоож зардал танах болсноос үүдэлтэй гэцгээж буй. Ухаандаа шинэ цэцэрлэг барихын оронд арван жилийн өмнө хэн нэгэн хувьчилж аваад өдгөө зориулалтын бусаар ашиглаж байгаа  цэцэрлэгийн барилгуудыг  улс 100 хувь буцааж авснаар  асуудлыг шийдчих юм гэнэ. Өөрөөр хэлбэл, бас нэг “Батаар” арга хэмжээ юм уу даа. Иймдээ тулбал, үнэхээр жишиг тогтоох гэж буй бол АН-ынхан ч бас өөрсдөө  үлгэр жишээ үзүүлэх ёстой байх. 1990-ээд онд хувьчлалаар авсан үйлдвэр аж ахуйн газрууд, нийтийн ахуй үйлчилгээний төвүүд, зарим сургууль, томоохон дэлгүүр, зочид буудлууд  гээд АН-ын гишүүд, лидерүүдийн үл хөдлөх  хөрөнгийн урт жагсаалт гарна. Түүнийгээ  100 хувь төрд буцааж өгөх хэрэгтэй. С.Баяр Ерөнхий сайд байхдаа өөрийн намынхнаас Тавантолгойн хувьцааг нь 100 хувь төрд буцаан авсан шиг Н.Алтанхуяг ч гэсэн тийм жишиг тогтоовол  хойч үедээ  100 жил  дурсагдахгүй гэхэд ядаж л сайн үйлс бүтээгчдийн тоонд нэр нь бичигдэж магадгүй. Энэ жил алтан гахай жилийн хүүхдүүд сургуульд орсноор ерөнхий боловсролын сургуулиудын даац хэтэрч сандаргасан. Тэгвэл АН-ынхан хувьчилж авсан хувийн дунд сургуулиудаа улсдаа бэлэглэмээр юм. Өрөө, тасалгаа нь ч гэсэн саруулхан, нэг ангид 40-50 хүүхэд шахцалдаж байгаа улсын сургуулиуд маань амьсгаа аваг. Бас эмнэлгийн хашаанд газар авч хувийн эзэмшлээ тогтоосон экс сайд нар, хөрөнгөлөг гишүүдийнхээ  өмчийг хураах хэрэгтэй. Тэгж байж зөв жишиг тогтоно. “Батаар” арга хэмжээ ч бас нэг талыг барьсан биш олныг хамруулж тэгш хуваарилалтыг бий болгосон  шударга бөгөөд жишиг арга хэмжээ болох учиртай.