Б.ДОЛЖИНЖАВ Барьцаагүйгээр зээл олгох шинэ шийдлийг бий болгосон “Zeely” аппликейшныг олон нийтэд танилцууллаа. 2018 оны наймдугаар сарын 23-наас хэрэглээнд нэвтэрсэн “Zeely” аппликейшн нь интернэтэд холбогдсон дурын хүн гар утас, таблет ашиглан орон зай, цаг хугацаанаас үл хамааран зээлийн гэрээг нэг удаа байгуулан, гэрээний хугацаанд хэрэглээний зээлээ барьцаагүйгээр авах боломжтой санхүүгийн үйлчилгээ юм. “Оптимал Эн Макс” компанийн үйл ажиллагаа хариуцсан дэд захирал Э.Төрмөнх “Бусад аппликейшн санхүү дээр тулгуурлаж зээл олгодог бол “Zeely” сэтгэл судлалд тулгуурлан зээл олгодог. Сэтгэл судлалын мэргэжлийн баг монгол хүний зан, сэтгэл зүйн онцлогт тохируулан боловсруулсан 24 асуултаар харилцагчийн сэтгэл зүйг дүгнэж зээл авах боломж болон зээлийн хэмжээг тодорхойлоод 70 мянгаас  хоёр сая хүртэл  төгрөгийн зээл олгодог. Өнөөдрөөс асуултаа шинээр боловсруулж 12 болгосноор харилцагчдад илүү хялбар боллоо. Өнөөдрийн байдлаар 60 мянга гаруй хүн үйлчилгээ авсан байна” гэв. Энэ өдөрлөгт банк санхүүгийн байгууллагын төлөөллүүд, хөрөнгө оруулагчид, финтек салбарын хөгжүүлэгчид болон оюутан залуусын төлөөлөл оролцсон бөгөөд “Good Vibe” энтертайнмент булантай танилцах арга хэмжээ, илтгэл танилцуулга гэсэн үндсэн хоёр хэсэгтэй байлаа. “Оптимал Эн Макс” компанийн үүсгэн байгуулагч Н.Мандахбаяр, А.Хосгариг, тус компанийн зөвлөх, доктор Д.Эрдэнэбаатар, сэтгэл судлаач Г.Мандухай нар Монголын санхүүгийн зах зээл, финтек буюу хиймэл оюун ухаан бидний амьдралд хэрхэн нөлөөлж байна, сэтгэл судлал хүний шийдвэр гаргалтад хэрхэн нөлөөлдөг болон “Zeely” аппликейшны онцлогийн талаар илтгэл  тавьж туршлага хуваалцан, санал бодлоо солилцлоо. Эх сурвалж www.polit.mn