С.САРУУЛ Гэмт хэргийн улмаас хүүхэд хохирч байгаа явдлыг таслан зогсоож, эцэг эхчүүдийн оролцоог нэмэгдүүлэх зорилгоор ЦЕГ-аас "Зөв тусгал" аяныг эхлүүллээ. Аяны талаар ЦЕГ-ын Урьдчилан сэргийлэх хэлтсийн Хүүхэд гэмт хэргээс урьдчилан хэлтсийн дарга, цагдаагийн хошууч Д.Будзаанаас тодрууллаа. - Хүүхэдтэй холбоотой гэмт хэргийн нөхцөл байдал ямар байна вэ?  -Сүүлийн гурван жилийн хугацаанд 2833 хүүхэд гэмт хэрэг үйлдэж, 4922 хүүхэд гэмт хэргийн улмаас хохирсон. Хүүхдүүд ихэвчлэн зодолдох, танхайрах, булаах, хүчиндэх гэмт хэргийн хохирогч болж байна. Энэ оны эхний дөрвөн сарын байдлаар хүүхэд хохирсон гэмт хэрэг 554 бүртгэгдсэн. Үүний 84 хувийг насанд хүрэгчид үйлдсэн.  Гэмт хэрэг үйлдэн шалгагдаж байгаагийн дийлэнх нь 16-18 насныхан байна. Эндээс харахад хүүхэд үйлдсэн болон хүүхэд хохирч байгаа тоо буурахгүй байгаа тул урьдчилан сэргийлэх ажлуудыг зохион байгуулах үүднээс  төрийн болон төрийн бус байгууллагууд хамтран "Зөв тусгал" хөдөлгөөнийг нэг сарын хугацаанд хэрэгжүүлэхээр болсон. -Аян хэрхэн хэрэгжих вэ. Ер нь хүүхдэдээ хяналт тавихад эцэг эхчүүдийн үүрэг оролцоог нэмэгдүүлэх ямар ажил хийж байна вэ? -Зөв тусгал хөдөлгөөн эцэг, эхчүүд рүү чиглэж байгаа. Хүүхэд бол томчуудын тусгал. Тиймээс эцэг эхчүүд ухамсартай байж, хүүхдээ ойлгохыг уриалах юм. Хөдөлгөөний хүрээнд төр, хувийн хэвшил, олон улсын байгууллагууд хамтраад  хүүхдийн насны онцлогт тохируулан хэрхэн харилцах, хүүхэд хүмүүжүүлэх оновчтой арга барил зэргээр эцэг ,эхчүүд, сурган хүмүүжүүлэгчдэд чиглэсэн сургалт, зөвлөгөө мэдээллийг өгнө. Дэлхийн зөн олон улсын байгууллагаас хүүхдийн чуулган зохион байгуулахаар болсон. Түүнчлэн Ерөнхийлөгчийн тамгын газар, ХНХЯ, ХЗЯ-тай хамтран “Хүүхэд хамгаалагч”  төслийг өнгөрсөн жил эхлүүлж, туршилтаар Сонгинохайрхан, Баянзүрх дүүрэгт хэрэгжүүлсэн. Ээнэ жил улсын хэмжээнд хэрэгжүүлэхээр болсон. Эх сурвалж: www.polit.mn