Ч.Зотол

 “Нийслэлийн түүхт 375 жилийн ой” сэдэвт гар урлал,  бэлэг дурсгалын бүтээлийн үзэсгэлэн худалдаа  өнөөдөр нээлтээ хийлээ. Үзэсгэлэн худалдааг “Улаанбаатар бизнес хөгжлийн төв”-өөс санаачилжээ. Ингэхдээ  хөгжлийн бэрхшээлтэй гар урлал эрхлэгч иргэн, аж ахуй нэгжүүдийг  хамруулснаараа онцлог юм. Нөгөөтэйгүүр, үзэсгэлэнд ирүүлсэн бүтээлүүдээс нийслэлийн түүхт ойг тохиолдуулан уригдаж ирсэн гадаад дотоодын хүндтэй зочдод дурсгах зорилгоор 40 сая төгрөгийн худалдан авалтыг хийх аж. Дэлхийн хотууд гадаадын зочдодоо дурсгах өөрийн орны онцлогийг харуулсан гар урлалын бэлэг дурсгалын бүтээлүүдийг хөгжлийн бэрхшээлтэй гар урлал эрхлэгчдээр үйлдвэрлүүлэн худалдан авдаг. Тэгвэл энэ  жишгийг  нэвтрүүлэх зорилгоор дээрх ажлыг хэрэгжүүлж байгаа.  Мөн энэ  ажлыг санаачлан хэрэгжүүлснээр гадаад руу урсч  буй  мөнгийг дотооддоо шингээхийн зэрэгцээ хөгжлийн бэрхшээлтэй гар урлал эрхлэгчдэд санхүүгийн тодорхой хэмжээний дэмжлэг үзүүлсэн ажил болно гэж “Улаанбаатар бизнес хөгжлийн төв”-ийн захирал Н.Баяраа ярьж байна. Үзэсгэлэн худалдаа  өнөөдрөөс эхлэн гурав хоног  үргэлжилнэ.  Энэ үеэр 1000-30000 төгрөгийн өртөг бүхий гоёмсог гар урлалын бүтээлүүд худалдаалагдах юм байна.