Б.НАМУУНТАМИР Онцгой байдлын ерөнхий газраас нийслэлийн Засаг даргын тамгын газартай хамтран нийслэлийн Гамшгаас хамгаалах иж бүрэн сургуулийг энэ сарын 24-26-ны өдрүүдэд зохион байгууллаа. Үүний хүрээнд Иргэдэд тохиолдож болзошгүй аюул, осол, гамшгаас өөрийгөө болон гэр бүлээ авран хамгаалах мэдлэг, дадлыг олгох зорилгоор нүүн шилжих дадлага сургуулийг НИТХ-ын 2016 оны 94 дүгээр тогтоолоор батлагдсан аюулгүй 111 цэгт зохион байгуулахад нийслэлийн 3200 гаруй нийтийн орон сууц, 120 гаруй мянган өрхийн 420 гаруй мянган иргэн оролцлоо. Мөн иргэдийг нүүлгэн шилжүүлэх дадлага сургуулийг нийслэлийн төвийн зургаан дүүрэгт зохион байгуулж, 3000 гаруй иргэнийг хамруулжээ. Гурван өдөр үргэлжилсэн гамшгаас хамгаалах иж бүрэн сургуулилтад нийслэл, дүүргийн Онцгой комисс, гамшгаас хамгаалах алба, мэргэжлийн ангийн удирдах бүрэлдэхүүн, нийслэлийн бүх иргэдийн идэвх санаачлагатай оролцож, ажилласныг сургуулийн удирдагч, ОБЕГ-ын   дэд дарга, хурандаа Б.Ууганбаяр онцлон дадлага, сургуулийг бүрэн, дүүрэн хангалттай дүгнэлээ хэмээн Онцгой байдлын ерөнхий газраас мэдээллээ. Эх сурвалж: www.polit.mn