Хяналт, хариуцлага алга гэж байнга хэл ам дагуулдаг ИНЕГ-ын тухай сэрэмжлүүлэгийг Засгийн газарт дуулгая. Ерөнхий сайд Үндэсний аюулгүй байдлын зөвлөлийн нэг гишүүний хувьд асуудлыг цааш нь нухацтай тавихгүй бол онгоц осолдсоны дараа орилоод нэмэргүй байлгүй. Шуудхан хэлэхэд,  агаарын замд  нарийн мэргэжлийн онцгой үүрэг гүйцэтгэдэг  ИНЕГ өнөөдөр мэргэжлийн бус, аль нэгэн улс төрч, дарга нарын танил тал, хамаатан садангаар дүүрчихээд байна. Өнгөрсөн өвлөөс эхлээд өчнөөн мэдээлэл дуулдаж байсан. Ганц нэгээс ишлэхэд, онгоцонд гэмтэл гарсан байхад нуун дарагдуулсан, нислэг үйлдэх явцад агаарын замд зорчигчдийн тав тухыг алдагдуулсан, нисэх багийн инженер техникийн ажилтан архидан согтуурсан гээд олон асуудал хэвлэлээр удаа дараа гарсан. Мөн тус газар төрийн байгууллага атлаа  хувийн компани, өндөр албан тушаалтнуудыг санхүүжүүлж байдаг тусгай объект болсон гэх  шүүмжлэл ч  дуулдаж байв.

Асуудал хаанаас хэрхэн эхэлсэн бэ гэвэл, Н.Алтанхуяг танхимаа бэхжүүлэх алхам хийж бие даагч нарыг албан бус сайдын статустай болгосноос үүдэлтэй. Дөрвөн бие даагчид нэг, нэг агентлаг хариуцуулахдаа  ИНЕГ-ыг  С.Ганбаатарт өгөхөд нь тэрээр “Би тэр салбарт  ашиг сонирхолгүй” гэснээр  нэг ёсондоо  бэлэг шиг солилцсон шиг байгаа юм. Ингээд Ц.Даваасүрэн гишүүний мэдэлд очсоноор дарга, цэргээс эхлээд бүхий л албан тушаалд өөрийн хүмүүсийг томилсон нь мэргэжлийн бус юм. ИНЕГ гэх нарийн мэргэжил, ур чадвар,  туршлага шаарддаг тусгай салбар ийнхүү түүний   ах дүү, танил тал, амраг садангийн холбогдолтой эрхмүүдийн цуглуулага болсон нь   Ц.Нямдоржийн УИХ-ын чуулган дээр хэлсэн   “Бие даагчид, биеэ үнэлж эхэллээ” гэсэнтэй агаар нэг юм. Үүний нэг жишээ болгож энд дурьдахад  ИНЕГ-т  одоогоос сарын өмнө өрнөж, дарга нарынх нь төмөр сейфэнд дарагдсан ажилчдынх нь хүсэлтийг дэлгэе. Тус газрын Хөрөнгө оруулалт, захиалагчийн албаны шууд харъяалсан хэлтсийн дарга Д.Совд мэргэжилтнүүдтэйгээ багаар ажиллаж чадахгүй, хүчээр асуудал шийдэх гэж зүтгэн болохгүй бол хална, солино хэмээн айлгаж суудаг гэнэ. Энэ нь нислэгийн аюулгүй байдалд сөргөөр нөлөөлөхөөр байгааг учирласан ажилтнуудынхаа асуудал шийдвэрлүүлэхээр өгсөн энэхүү хүсэлтийг ИНЕГ-ын дарга С.Буяндалай наймдугаар сарын 27-нд авсан байх учиртай ч өнөө хэр таг чиг байна. Д.Совдын хувьд Ц.Даваасүрэн  БСШУЯ-ны санхүү, хөрөнгө оруулалтын газрын дарга байхдаа тус яаманд ажилд авч, өдгөө ИНЕГ-т өөрийн төлөөний хүнээр томилон ажилуулж байгаа гэх мэдээлэл дуулддаг. Энэ мэтчилэн тус газрын санхүү, хөрөнгө оруулалт талын мөнгө төгрөгтэй харилцдаг чухал албуудад тэрээр ах, дүү, танил талаа томилон ажилуулж байгаад ажилтнууд нь шүүмжлэлтэй ханддагаа ярьж байна.