Хоёр долоо хоног үргэлжилсэн ээлжит бус чуулган өнгөрсөн баасан гаригт хаалтаа хийв. Гэвч хаалтын хуралдаанд хэлэлцэх асуудал байсангүй. Эрхэм гишүүд эдийн засгийн нөхцөл байдалтай холбогдуулан Засгийн газраас өргөн барьсан таван хуулийн төсөл хэлэлцэхээр төлөвлөсөн ч нэгийг нь ч баталж чадсангүй. Уул уурхай, алт, ашигт малтмалтай холбоотой хуулийн өөрчлөлтүүд иргэний хөдөлгөөнийхөн болон УИХ дахь сөрөг хүчин, зарим нам, эвслийн бүлгийн эсэргүүцэлтэй тулсан юм. Буун дуу, гранат гээд сүр дуулиантай, олныг цочирдуулан эхэлсэн ээлжит бус чуулган ямар ч үр дүнд хүрэлгүй чимээгүй өндөрлөв. Засгийн газар зорилгодоо хүрч, таван хуулиа батлуулж чадсангүй.

Уг нь Хөрөнгө оруулалтын тухай болон Хөрөнгө оруулалтын сангийн тухай хуулийг ээлжит бус чуулганаар хэлэлцэн баталж бусдыг нь маргааш эхлэх намрын чуулган руу шилжүүлэхээр Ардчилсан намаас бусад нам, эвслийн бүлэг санал гаргасан байв. Олонхийн бүлэг энэ саналыг хүлээж авсан ч өнгөрсөн баасан гаригт байдал өөрчлөгджээ.

Чуулганы хаалтын өмнө Эдийн засгийн байнгын хорооны хуралдаанаар  Хөрөнгө оруулалтын тухай, Хөрөнгө оруулалтын сангийн тухай хуулийн төсөл, тэдгээрийг дагалдан зарим хуулийг хүчингүй болсонд тооцох, зарим хуульд нэмэлт, өөрчлөлт оруулах тухай төслүүдийн эцсийн хэлэлцүүлгийг хийхээр төлөвлөсөн байв. Байнгын хорооны хуралданаар эхлээд Хөрөнгө оруулалтын сангийн тухай, уг хуулийн төслийг дагалдан зарим хуульд нэмэлт, өөрчлөлт оруулах хуулийн төслүүдийн эцсийн хэлэлцүүлгийг хийхээр болж, төслүүдийг эцсийн хэлэлцүүлэгт бэлтгэсэн талаарх ажлын хэсгийн танилцуулгыг сонслоо.

  Ажлын хэсэг чуулганы нэгдсэн хуралдаанаар төслүүдийн анхны хэлэлцүүлгийг хийх үеэр санал хурааж шийдвэрлэсэн зарчмын зөрүүтэй болон найруулгын чанартай томъёоллуудыг нэрбүрчлэн тусгасны зэрэгцээ анхны хэлэлцүүлгийн үед хуралдаан даргалагчаас төслийн зарим зүйл, заалтыг гүйцээн боловсруулах чиглэл өгснийг бүрэн тусгаж хуулийн төслийн эцсийн хувилбарыг бэлтгэсэн тухайгаа танилцуулав.

  Харин гишүүн Ц.Нямдорж төслийн 3.1 дэх хэсгийг өөрчлөн найруулсан нь агуулгын хувьд ойлгомжгүй байгааг ажлын хэсгээс тодруулаад төсөлд хуулийн үйлчлэх хүрээг энэ хуулиар зохицуулах, энэ хуульд хамаарахгүй асуудал гэсэн байдлаар тусад нь салгаж зааж өгөх нь зүйтэй байна гэсэн санал гаргалаа. Иймээс байнгын хорооны гишүүд төслийн энэ зүйлийн “Нийгмийн даатгалын сан, төрийн өмчийн мөнгөн хөрөнгөөр болон төрийн өмчит компанийн хувьцаагаар үүсгэн байгуулж, тусгай хуулиар зохицуулсан сангийн хөрөнгөөр хөрөнгө оруулалтын үйл ажиллагаа эрхлэхтэй холбогдсон харилцаанд энэ хууль хамаарахгүй” гэсэн заалтыг тойрч нэлээд ярилцсаны эцэст байнгын хорооны дарга Б.Гарамгайбаатар энэ заалтыг дахин авч үзэж өөрчлөн найруулж оруулж ирэх чиглэл өгснөөр энэ асуудлыг хэлэлцэхийг түр хойшлуулсан юм.

Гишүүн Ц.Нямдорж “Хөрөнгө оруулалтын тухай хуулийн төслийг заавал ээлжит бус чуулганаар батлахыг яарахгүйгээр гишүүд ихээхэн няхуур хандах хэрэгтэй байна. Иймээс хуулийн төслийг намрын чуулганы эхэнд хэлэлцэх батлах нь зүйтэй” гэсэн санал гаргалаа. Гишүүн Г.Батхүү ч Хөрөнгө оруулалтын хуулийн төслийг сайн нягталж байж гаргах ёстой, иймээс төслийн хэлэлцүүлгийг ээлжит бус чуулганд шилжүүлэх Ц.Нямдорж гишүүний саналыг дэмжиж байна гэдгээ хэлэв.

  Мөн гишүүн Д.Эрдэнэбат ээлжит бус чуулганаар улс орны эрх ашигт нийцсэн чухал шийдвэр гаргаасай гэж олон нийт хүлээж байгаа. Өргөн баригдсан хууль тогтоомжийн төслүүдийг хэлэлцүүлэгт бэлтгэхэд гишүүд идэвх чармайлттай сайн ажилласан. Эдгээр төслүүдэд нухацтай хандаж, зөв бодлого зорилготой сайн хууль гаргах учиртай гээд хуулийн төслүүдийг намрын чуулганаар эцэслэн шийдвэрлэх байр суурьтай байгаагаа илэрхийлэв. Гишүүн Л.Энх-Амгалан, А.Тлейхан нар ч ийм саналтай байгаагаа хэллээ. Ингээд хэлэлцүүлгийг хойшлуулсан юм.

УИХ-ын энэ удаагийн ээлжит бус чуулганаар Засгийн газраас өргөн барьсан Хөрөнгө оруулалтын тухай, Түгээмэл тархацтай ашигт малтмалын тухай, Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай хуульд нэмэлт, өөрчлөлт оруулах тухай, Алтны худалдаанд ил тод байдлыг бүрдүүлэх тухай, Хөрөнгө оруулалтын сангийн тухай хуулийг хэлэлцэн батлахара төлөвлөсөн юм.