Х.ОЮУНБОЛД Хойд Солонгосын удирдагч Ким Жон Ун ОХУ-ын ерөнхийлөгч Владимир Путиныг эх орондоо айлчлахыг урьсан байна. ОХУ-ын ерөнхийлөгч урилгыг нь зөвшөөрсөн гэж Хойд Солонгосын Цахилгаан мэдээний төв агентлаг мэдээллээ. Мэдээнд “Удирдагч Ким Жон Ун, ерөнхийлөгч Владимир Путиныг Хойд Солонгост боломжтой гэж үзсэн үедээ айлчлахыг урьсан. Владимир Путин урилгыг зөвшөөрсөн” гэж бичсэн байна. Мөн хоёр орны тэргүүн нар талуудын бүс нутаг дахь аюулгүй байдал, энхтайвныг баталгаажуулахын тулд стратегийн хамтын ажиллагаа, харилцан ойлголцол, ирээдүйн харилцаагаа бэхжүүлэхээр тохиролцсон талаар мэдээлжээ. Түүнээс гадна хоёр орны худалдаа, талуудад харилцан ашигтай эдийн засгийн харилцааны төвшинг ахиулах арга хэмжээг авахаар тохиролцсон. Мөн олон улсын худалдаа, эдийн засаг, шинжлэх ухаан, технологийн хамтын ажиллагааг бэхжүүлэхийн тулд хоёр орны засгийн газар хоорондын комиссын ажиллагааг эрчимжүүлэхээр тохиролцсон талаар нэмж дурдсан байна. Эх сурвалж: www.polit.mn