Х.ОЮУНБОЛД ОХУ-ын  ерөнхийлөгч Владимир Путин Хойд Солонгосын удирдагч Ким Жон Унтай уулзахаар Владивостокт ирсэн байна. Тэдний анхны уулзалтыг орон нутгийн цагаар 15:00 эсвэл 16:00 цагт Оросын арал дахь Ойрхи Дорнодын их сургуульд хийхээр төлөвлөжээ. “Спутник” агентлагийн сэтгүүлчийн мэдээлснээр ерөнхийлөгч  Владимир Путин Оросын арал дахь энэ сургуульд нисдэг тэргээр ирсэн байна. Харин Кремлийн ордны зөвлөх Юрий Ушаков эхлээд хоёр орны тэргүүний ганцаарчилсан хэлэлцээр болно. Дараа нь цөөн хүний бүрэлдэхүүнтэй уулзалтаас гадна хоёр орны олон төлөөлөгч оролцсон уулзалт болно гэв. Уулзалтын үеэр хэлэлцэх гол асуудал нь Солонгосын арлын цөмийн зэвсэг, Хойд, Өмнөд Солонгосын зөрчлийг шийдвэрлэх юм байна. Тодруулбал, хоёр орны улс төр, эдийн засаг, соёл болон Зүүн хойд Азийн аюулгүй байдлыг баталгаажуулахын тулд хамтын ажиллагааны талаар хэлэлцэх ажээ. Тэдний анхны уулзалтад оролцохоор Хойд Солонгосын удирдагч Ким Жон Уны тусгай галт тэрэг Владивостокт өчигдөр ирсэн юм. Түүнийг тус хотын төмөр замын буудал дээр улаан хивс дэвсч, хүндэтгэлийн хөгжимтэй угтаж авсан байна. Мөн Хойд Солонгосын удирдагчийг уулзалт болох их сургууль руу авч явах хоёр хар лимузин хүлээж байсан аж. Эх сурвалж: www.polit.mn