Б.Туул
Улсын томоохон их, дээд сургуулиуд өнгөрсөн хичээлийн жилд бүрэлдэхүүн сургуулиудаа цөөлж, бүтцийн өөрчлөлт хийсэн. Үүнтэй холбогдуулан салбарын яамнаас “Мэргэжлийн чиглэл, индекс”-ийг шинэчлэн баталсан. Тэгвэл энэ ажлын хүрээнд Боловсрол, шинжлэх ухааны сайд Л.Гантөмөрийн А/285 дугаар тушаалаар бакалаврын ерөнхий суурь чиглэлийн заавал судлах хичээлийн жагсаалтыг баталжээ. Үүнд, Монголын түүх, соёл, ёс заншил , Монгол хэл бичиг, найруулга зүй, хүний хөгжил, харилцааны ёс зүй, эрх зүй, сэтгэлгээний түүх, соёл гэсэн хичээлүүд багтсан байна. Эдгээр хичээлийг судалснаар оюутан залуус эх хэл, соёлоо зөв эзэмших, хэл ярианы болон бичиг үсгийн боловсрлыг төгс эзэмших, Монголын түүхийн эх сурвалж бичгүүдийг тоймлон дүгнэх зэрэг олон чадварыг эзэмшинэ гэж үзэж байгаа аж.