Ж.ЦОГЗОЛМАА Өнгөрсөн онд олон улсын хориг арга хэмжээнүүд олноор өрнөсний улмаас ОХУ болон Хойд Солонгосын хоорондын худалдаа эргэлт үлэмж хэмжээгээр буурсан хэмээн ОХУ-ын Ерөнхийлөгчийн зөвлөх Юри Ушаков хэлсэн байна. “Хоёр улсын худалдааны эргэлт өмнөх жилийнхээсээ 56 гаруй хувиар буурч, ердөө л 34 сая ам.долларт хүрсэн” хэмээн Ушаков ярьжээ. Түүний үзэж буйгаар ОХУ-ын Ерөнхийлөгч В.Путин болон Хойд Солонгосын удирдагч Ким Жон Ан нарын уулзалт хоёр орны харилцааг сайжруулах, илүү өргөн хүрээнд аваачихад чиглэх аж. Хоёр орны удирдагчид улс төр, худалдаа, эдийн засаг зэрэг сэдвээр ярилцах гэнэ. Хойд Солонгосын эсрэг хориг арга хэмжээнүүд нь тус улстай холбоотой ажилладаг улс орнуудад ч мөн ихээхэн нөлөөлсөн байна. “ОХУ Хойд Солонгост хүмүүнлэгийн туслалцаа үзүүлсэн хэвээр байх болно. 2011-2017 онд ОХУ тус улсад 25 сая ам.долларын бараа нийлүүлсэн байна. 2018-2019 онд энэ тоо найман сая ам.долларт хүрсэн” гэж Юри Ушаков онцлов. Эх сурвалж: www.polit.mn