Т.САЙХАН НИТХ-ын төлөөлөгч С. Мөнхчулуун  Нийслэлийн засаг дарга С.Амарсайханыг БНХАУ-ын компаниар 50 га газар хүлэмжийн аж ахуй эрхлүүлэх шийдвэр гаргасан талаар мэдэгдсэн билээ. Тэгвэл өнөөдөр /04.22/ Нийслэлийн Засаг  дарга С.Амарсайхан  дээрх мэдээлэлд хариулт өглөө.  Тэдний мэдээллийг тоймлон хүргэж байна. С.Амарсайхан: С.Мөнхчулуун өөрөө ашиг сонирхлын зөрчилтэй -Засгийн газрын хэрэг эрхлэх газрын тэргүүн дэд дарга Г.Баясгалангаас миний нэр дээр Тяньжин хотын захиргаатай хүнсний ногоо тариалах, хүлэмж байгуулах асуудлыг судлах албан бичгийг гуравдугаар сарын 27-ны өдөр ирүүлсэн. Тэр өдрөө би Засгийн газрын хэрэг эрхлэх газрын дарга Л.Оюун-Эрдэнийн нэр дээр “Хоёр улсын  хамтын ажиллагааг хөгжүүлэх зорилго бүхий арван бодит ажлыг хэрэгжүүлэх хүрээнд холбогдох тооцоо судалгааг хийх нийслэлийн 100 хувийн өмчит хөрөнгө оруулалтын менежментийн компанийн нэрийг хүргүүлсэн. Үүнд ямар нэгэн газар олголт явагдаагүй. Харин дотоодын хүнсний ногоо тариалагчдыг хэрхэн дэмжиж, жилийн дөрвөн улиралд бид өөрсдөө хүлэмж байгуулж, өөрсдөө хүнсний аюулгүй байдлаа хангаж монгол ногоогоо хэрэглэх талаарх ажлыг судлах зорилгоор компаниудын нэрийг хүргүүлсэн юм. Үүнийг НИТХ-ын төлөөлөгч С.Мөнхчулуун улс төрийн зорилгоор зориуд мушгин гуйвуулж, хотын захирагч шийдвэр гаргаж хятадуудад 50 га газрыг олгож байна гэх мэдээлэл  түгээсэн. Тийм асуудал болоогүй гэдгийг албан ёсоор хэлье.   Миний нэр төрд халдаж гүтгэж байгаа нь С.Мөнхчулууны өөрийнх нь хувийг ашиг сонирхолтой  шууд холбоотой. Олон нийтэд ташаа ойлголт өгч, хувь хүний нэр төрд халдах замаар миний хийж байгаа ажлыг сулруулах гэж оролдох боллоо. Ингэснээр өөрсдийн хийсэн гэмт хэрэг авлига хулгайгаа нуун дарагдуулах замаар бүх төрлийн гүтгэлгийг зохион байгуулахад нэр бүхий хүмүүс эрчимтэй ажиллаж байна. С.Мөнхчулуун: Хотын дарга Хятадуудад 50 га газарт зөвшөөрөл өгөх гэж байна -Монгол Улсын 50 га газарт хүлэмжийн аж ахуй эрхлэх зөвшөөрлийг БНХАУ-ын төрийн өмчит “Тяньжинь фүүдс” компанид олгох асуудлыг өнгөрсөн сарын 27-ны өдрийн НИТХ-ын тэргүүлэгчдийн хуралдаанаар хэлэлцсэн ч дэмжээгүй. Засгийн газрын хэрэг эрхлэх газрын дарга Л.Оюун-Эрдэнийн ахлах зөвлөх О.Бат-Найрамдалаар ахлуулсан ажлын хэсгээс НИТХ-д чиглэл өгсний дагуу Хотын дарга С.Амарсайхан өөрийн нэр дээр тус асуудлыг оруулж хэлэлцүүлсэн ч дэмжлэг аваагүй юм. 50 га газар нь өнөөгийн Монгол Улсын нийт хүлэмжийн 90 орчим хувьтай тэнцэх том хэмжээтэй газар юм. Хэрэв энэ төсөл хэрэгжвэл Монгол Улсын үндэсний аюулгүй байдалд сөргөөр нөлөөлөх, хүлэмжийн аж ахуй эрхлэгч хувийн хэвшлийнхэн дампуурах, хөрсийг химийн хорт бодис бордоогоор хордуулах аюул нүүрлэнэ. Иймд Засгийн газар, Нийслэлийн удирдлагууд нухацтай авч үзэж монголчуудынхаа эрх ашигт нийцсэн шийдвэрүүдийг гаргахыг шаардаж байна. Хэрэв эх орондоо ээлтэй шийдвэр гаргахгүй бол орон даяар тэмцэл өрнүүлнэ. Эх сурвалж:www.polit.mn