Б.Намуунтамир Төв цэвэрлэх байгууламжид гарсан ослын  нөхцөл байдлын талаар Нийслэлийн  Засаг даргын орлогч Ж.Батбаясгалан Ус сувгийн удирдах газрын дарга Ц.Төрхүү, Нийслэлийн ерөнхий менежер, ажлын албаны дарга Т.Гантөмөр нар мэдээлэл хийлээ.  Төв цэвэрлэх байгууламжид энэ сарын 16-ны 15.20 минутад түүхий лагийн насос станцад хий ялгарсны улмаас ажилчид муужирч дөрвөн хүн лаг шаварт унаж нас барсан харамсалтай хэрэг гарсан байна. Ажилчдыг аврахаар таван ажилтан  түүхий лагийн насос станцад орсон боловч хийнд муужирч орох аргагүй нөхцөл байдал үүссэн байна. Нийслэлийн онцгой байдлын аврах анги ослын газарт аврах үйл ажиллагаа явуулан амиа алдсан иргэдийн цогцсыг гаргажээ.  Мөн хамт ажиллаж байсан найман ажилтан хурц хордлогод орон эмнэлэгт хүргэгдсэн байна. Нийслэлийн  засаг даргын орлогч Ж.Батбаясгалан “Ажлын хэсэг түүхий лаг шахах насос станцыг 48 цагийн дотор хэвийн горимд шилжүүлэхээр ажиллаж байгаа. Одоогоор 50-60 см зузаантай лаг хуримтлагдсан. Мөн ажлаа хийж яваад амь эрсэдсэн хүмүүсийн ар гэрийнхэнд эмгэнэл илэрхийлж, бүх талаар нь дэмжлэг үзүүлнэ. Ослын үед хурц хордлогод орсон хүмүүсээс гадна сэтгэлзүйн хямралд орсон нийт 8 хүн эмчлүүлж байна. Биеийн байдал нь тогтворжиж байгаа гэсэн мэдээллийг эмнэлгийн байгууллагаас өгсөн . Орчин нь хортой нөхцөл байдал үүссэн. Дахин осол гарахаас сэргийлэх ажлыг зохион байгуулж байна. Хэрэг бүртгэл мөрдөн байцаалтад хөндлөнгөөс саад болох эрх надад байхгүй. Тиймээс хуулийн байгууллага шалгаж байгаа учир мэдээлэл өгөх боломжгүй байна. Энэ талаар цаг тухайд нь мэдээлэл өгнө” гэлээ. Эх сурвалж:www.polit.mn