Т.САЙХАН Туулын бургасыг хядаж байгаа асуудал олон нийтийн анхаарлын төвд ороод байна.  Тэгвэл өнөөдөр /04.12/ "Зүүнбаян рэйфанери” компанийн удирдлагууд мэдээлэл хийлээ. "Зүүнбаян рэйфанери” компанийн захирал О.Сайнбаяр:  -Нийт 33 тэрбум төгрөгийн төсөл. Одоогийн байдлаар 16.7 тэрбум төгрөгийг зарцуулаад байна. Нийт 20-30 залуусын хөрөнгө нийлүүлж эхэлсэн төсөл. Бидний ганц хэлээд байгаа зүйл нь нэг улстөрч гарч ирээд цуцал гэж болохгүй шүү дээ. Ганц компани руу дайрахаа л больчих хэрэгтэй байна. Энэ газрыг 2008 оны наймдугаар сарын 8-ны өдөр Байгаль орчин, аялал жуулчлалын яамнаас авсан юм билээ.  Бидний хэдэн залуус 2013 оноос аялал жуулчлалын цогцолбор байгуулах төсөл хэрэгжүүлэхээр эхэлсэн. Их тэнгэр аялал жуулчлалын цогцолборыг барихын тулд нэлээд хэдэн газар судалсны үндсэн дээр дэд бүтэц, бүх зүйл нь байгаа, нийслэлээс холгүй тул уг газрыг сонгож, газар эзэмшигч компанийн захирал болох С.Уламбаяр гэдэг хүнтэй танилаараа дамжуулан уулзаж, төслөө танилцуулсан. А даалгавар, холбогдох техникийн нөхцөл зэрэг бүх зүйлийг нь хууль журмын дагуу бүрдүүлэн, ажлын зургаа зохих ёсны газруудаар батлуулж, албан ёсны, ном журмын дагуу үйл ажиллагаагаа 2014 оноос эхэлсэн. Бургас хядсан асуудал дээр бид байгаль орчны нарийвчилсан үнэлгээ, дүгнэлтийг гаргуулж, Нийслэлийн байгаль орчны газарт хандан бүтээн байгуулалттай холбоотой бургасыг холдуулах шаардлагатай байгаа хүсэлтийг өгч, бургасны нөхөн төлбөр хэмээн 11 163 420 төгрөгийг байгаль орчин нөхөн сэргээх төлбөрт төлөх бичиг ирсэн. Үүнийг нь тушаасан. Мөн энэ асуудлаар нийслэлийн Байгаль орчны газрын дарга Э.Баттулга байр сууриа илэрхийлжээ.  Тэрээр“Бид бургас огтлох зөвшөөрөл олгоогүй. 2014, 2017 онд Богд уулын захиргаанаас ирүүлсэн тоотын дагуу хохирлын үнэлгээ тооцож, тус компанид хүргүүлсэн. Улмаар торгууль тавьж, газрын зөвшөөрийг нь цуцалсан байдаг. Энэ компани Ойн хуулийг зөрчсөн.   Түүнчлэн тус компани 2017 онд дээрх зөрчлөө дахин гаргаснаар барахгүй илүү том газрын буюу 0.6891 га газрын бутыг сүйдэлсэн байна. Иймд дахин 11.1 сая төгрөгийн нөхөн төлбөр ногдуулжээ. Тус компани Богдхан уулын дархан цаазат газарт эдгээр нөхөн төлбөрийг төлснөөр үйл ажиллагаа явуулах эрхтэй болохгүй гэжээ. Эх сурвалж:www.polit.mn