Б.НАМУУНТАМИР Нийслэлийн онцгой байдлын газарт Нийслэлийн Засаг даргын нэгдүгээр орлогч Ж.Батбаясгалан, ОБЕГ-ын дэд дарга, хурандаа Б.Ууганбаяр, НОБГ-ын дэд дарга, дэд хурандаа Б.Мягмардорж нар гамшгийн үед иргэдийн бэлэн байдлыг хангах, мэдээллээр бүрэн хангах талаар сэтгүүлчдэд сургалт явууллаа. Улаанбаатар хотод газар хөдлөлтийн идэвхжил нэмэгдэж байгаа энэ үед гэнэтийн аюул занал, нөхцөл байдал, цагийн байдалтай уялдуулж бүх нийтийг хамарсан гамшгаас хамгаалах сургалтыг Онцгой байдлын ерөнхий газраас дөрөвдүгээр сарын 24-26-нд зохион байгуулах гэж байна. Мөн энэ сарын 25-нд албан байгууллага, ЕБС, цэцэрлэгийн үйл ажиллагаа 10:00 цагаас эхэлнэ. Энэ өдөр өглөөний 07:00-09:30 цагийн хооронд нийслэлийн замын хөдөлгөөнийг хязгаарлахаас гадна Улаанбаатараас орж, гарах хөдөлгөөнийг түр зогсоохоор болжээ. Тиймээс гурван цагийн хугацаанд иргэдийг хүлээцтэй байхыг хүссэн юм. ОБЕГ-ын дэд дарга, хурандаа Б.Ууганбаяр “08:00 цагт зарлан мэдээллийн дохиог нийслэл даяар дуугаргаснаар гамшгийн сургуулилт эхлэх тул дохио сонссон эсэхээс үл хамааран орон байрнаасаа гарч, аюулгүйн талбайд цуглана. Нийслэлийн Иргэдийн төлөөлөгчдийн хурлаас баталсан 111 аюулгүйн талбай байдаг. Иргэд энэ талбайд цугларах ёстой. Гамшгаас хамгаалах иж бүрэн сургуулилтад бүх хүн оролцох ёстой тул цэцэрлэг, сургууль, албан байгууллагын ажил эхлэх цагийг хойшлуулсан. 09:30 цагаас эхлэн замын хөдөлгөөн хэвийн болж, албан байгууллагын үйл ажиллагаа хэвийн үргэлжилнэ. Сургуулилтад хүн бүр оролцох ёстой. Хэрэв энэ арга хэмжээнд оролцоогүй аж ахуйн нэгж, хувь хүн, албан байгууллагад хуулийн дагуу хариуцлага хүлээлгэнэ. Тиймээс бүх хүнийг идэвхтэй оролцохыг хүсч байна” гэсэн юм. Эх сурвалж www.polit.mn