Монголын зах зээлд ам.долларын ханш огцом өссөөр байна. Хоёр сарын өмнө 1400 төгрөгтэйт тэнцэж байсан ам.доллар одоо 1750-д хүрчээ. Үүнийг эсэргүүцсэн жиргээчид өнгөрсөн баасан гаригт Төрийн ордны өмнө цугласан юм. Зүрхний гэгдэх Б.Болдсайхан эмчээр ахлуулсан Сангийн дэд сайд асан Ч.Ганхуяг нарын зургаан хүн төрийн удирдлагуудад салаавч гаргаж эсэргүүцлээ илэрхийлсэн юм.

Тэд ам.долларын ханш огцом өсч буй нь төр засгийн удирдлагуудын буруу хэмээн үзэж байв.

Энэ үйлдлийнхээ талаар Б.Болдсайхан “Миний хийж чадах үйлдэл салаавч л байна. Би дарга, сайд, УИХ-ын гишүүн биш. Надад хохиролтой, миний түрийвчнээс мөнгөний минь 25 хувийг хулгайлаад байгаа учраас иргэн хүнийхээ үүргийг гүйцэтгэж байна.

Иргэд зунжин, намаржин ажиллаж байхад Засгийн газар ажиллахгүй байна. Дөрөв, тавдугаар сараас шоу хийгээд ажиллаагүй. Хүмүүсийн халаасанд байгаа мөнгөний дөрөвний нэг нь алга болчихоод байхад Улсын их хурлынхан амраад явж байгааг юу гэж ойлгох вэ.

Тэдний юу хийх ёстой нь тодорхой байгаа. Өнгөрсөн жил баталсан Хөрөнгө оруулалтын тухай хууль нь гадаадын хөрөнгө оруулагчдыг үргээсэн, дотоодын хөрөнгө оруулагчдыг айлгасан.

Одоо энэ хуулиа цуцлах хэрэгтэй. Сайд дарга нар амьдрал сайхан болж байна гэх юм. Гэтэл бодит амьдралд тийм биш байна. Тиймээс иргэдээ анхаарахгүй байгаа төр, засгийн удирдлагуудад энэ үйлдлээ зориулж байна. Байшин руу салаавч гаргаж болохгүй гэсэн хуулийн заалт байхгүй болохоор намайг буруутгахгүй” хэмээв.