Шатраар бол маданд орсон МАН тэснэ, тэснэ гэхэд яаж тэсэх вэ гэгчээр саяхнаас гэнэт ам нээж, хэлд ороод байна. Ахмадууд нь ам нээх болгондоо эх орон минь, эдийн засаг минь сүйдлээ гээд л, шинэчлэх юмаа олж ядсан залуус “Засгийн газрыг шинэчилье, Н.Алтанхуягийг огцруулъя” гэж буй. Бас болоогүй ээ, саяхныг хүртэл уруу царайлж явсан бол хацарт нь бага ч болтугай гэрэл гийхчээ аядах. Хэлж, ярьж буйнхаа үр дүнг үзээгүй байж “Уул үзээгүй байж” гэгчийн үлгэрт жаргаж суух шиг. Яагаад ингэх  болов гэдэг ч  учиртай. Дотоодоос нь гарч буй авиа  аль зүг нисч буйг  анирдвал МАН Засгийн газарт орох хүсэлтэй гэнэ. Сайд нарынхаа нэрсийг ч дотооддоо сайтар ярьж, хэн аль яаманд очихыг ч товлочихсон дуулдана. АН доторх чиг заагчид болох  “Алтан гадас”-чууд, тэднээр дамжуулан Ерөнхий сайдтай  хэд хэдэн удаа уулзаж санал солилцсон. Уулзалтын агуулга  үндсэндээ засагт орох тухай байсан  нь ойлгомжтой. Ингээд сайдын суудалд заларцгаах сайхан өдрийг хүлээж, Н.Алтанхуяг ч  “Аргат шар” шиг хэчнээн ч удаа аргацаасан юм, эцэст нь нэг нь огцруулах, огцрохдоо тулах шив.  МАН-ынхан  шинэчлэлийн Засгийн газрыг шинэчлэх 11 заалт бүхий төлөвлөгөөгөө “Шинэчлэлийн хороо”-ны залуусынхаа гарт бариулчихаад ард нь алгаа ташиж сууна. Нэг үеэ бодвол тус намын иймэрхүү зүйлд гаршсан сайн  “дасгалжуулагч” –д ямар нэгэн шалтгаанаар зүг буруулж, зарим нь нүүр буруулсан. Иймд нүүрээ  хэдэн давхар ширэлснээр нь Ц.Нямдоржийнхоо “баадууг мушгиж” хэвлэлээр хүч нэмсэн ярилцлага өгүүлж амжиж. Байнга эрх мэдлээр далайлгаж ирсэн, одоо чадахаа байсан. Албан тушаалаар цадталаа  угжуулж   байсан, одоо тэр нь зогссон. Дандаа мөнгөтэй, түрийвч нь түнтгэр байсан, одоо нимгэрсэн. Хаана ч явсан “Дарга дээшээ, дээшээ” гээд даналзаж явсан, даанч одоо хөг нь өнгөрсөн тул МАН-ынхан ийм л арга сэдэж сууна. Тэд үнэхээр тэссэнгүй, улс төрийн том хүчний  зангараг харуулж  “Ялагдал болж дараагийн ялалтын багш нь” гээд гэдийж сууж үнэндээ чадсангүй.