Ч.ГАНТУЛГА УДБЭТ-ын хамт олон энэ онд гадаад харилцаа, хамтын ажиллагаагаа өргөжүүлэх зорилгоор олон томоохон ажил төлөвлөсний нэг нь БНСУ-ын “Wise” балетын театртай хамтарсан “Нigh Feeling”  модерн тоглолт юм. Тус уран бүтээлийн хүрээнд Солонгосын “Wise” театрын 20 гаруй хүний бүрэлдэхүүнтэй баг манай улсад ирээд байна. Тус театр нь эх орондоо 2005 оноос тасралтгүй үйл ажиллагаа явуулсан бөгөөд хоёр монгол гоцлоочтой юм. 14 жилийн хугацаанд жилдээ гадаад болон дотоодын 80 гаруй тоглолт хийдэг туршлагатай, чадвартай хамт олон аж. “Wise” театрын гоцлол бүжигчин М.Намсрай “Би 2015 онд урилгаар энэ театрт ажиллаж эхэлсэн. Манай театр Солонгостоо эхний таван тэргүүлэх компанид ордог. Миний хувьд дөрвөн жилийн дараа эх орныхоо театр бүжиглэх гэж буйдаа сэтгэл их догдолж байна. Дурсамж бүхэн минь сэргэж байна. Энэ удаад бид гурван өөр утга агуулгатай модерн балет тоглох төлөвлөгөөтэй ирлээ. Модерн балет илүү эрх чөлөөтэй гэдгээрээ онцлог. Тиймээс үзэгчдэд таалагдана гэдэгт итгэлтэй байна” гэсэн юм. Харин “Wise” театрын захирал Ким Кил Юун “Танай сайхан оронд ирсэндээ баяртай байна. Манай театрын хувьд анх удаа 60 гаруй жилийн түүхтэй Монголын театрт уран бүтээлээ хүргэх гэж байгаа нь нэр төрийн хэрэг билээ. Хамтарсан уран бүтээл сайхан болно гэдэгт итгэлтэй байна. Цаашдаа ч олон бүтээлд хамтрах байх” гэв. Тус театрын гоцлол бүжигчин Ким Хан Сиул “Миний хувьд энэ тоглолт гадны оронд хийж буй анхны аялан тоглолт. Тиймээс сэтгэл их хөдөлж байна. Монголын театрыг их чадварлаг бүжигчидтэй гэж сонссон. Тиймээс танилцаж, туршлага солилцох мөчийг тэсэн ядан хүлээж байна” гэсэн юм. Монгол, Солонгосын уран бүтээлчдийн хамтарсан тоглолт маргааш, нөгөөдөр УДБЭТ-ын тайзнаа болох юм. Эх сурвалж: “Зууны мэдээ” сонин 2019.4.4 № 69 (6036)