Ч.ЗОТОЛ Баянзүрх дүүргийн ИТХ-ын төлөөлөгч Б.Дэмбэрэл “Үндэсний мэдээллийн төв”-д хэвлэлийн хурал хийж,  Скай резорт цанын бааз, “АСЕМ Вилла” хотхоны бохир ус хальж, Туул гол руу цутгаж байгаа талаар мэдээллээ. Дүүргийн ИТХ-ын төлөөлөгчийн хувьд тэрээр  өнгөрсөн хоёрдугаар сарын 27-ны  өдөр иргэд, оршин суугчдаас ирүүлсэн  мэдээллийн мөрөөр дээрх газруудад  очиж нөхцөл байдалтай танилцжээ.  Тухайн үед  “АСЕМ Вилла” хотхоны  барилгын баруун хойд цооногоос их хэмжээний бохир ус хальж,  замын хажуу руу  урсч хөлдсөн байжээ. Иймд нийслэлийн шуурхай байгууллагуудтай холбогдож, “Эм-Си-Эс”  компанийн ашиглалт хариуцсан  албаныхантай  уулзан шаардлага тавьж,  МХЕГ-ын даргаас яаралтай  арга хэмжээ авахыг хүсчээ. Энэ дагуу  МХЕГ-ын дарга Н.Цагаанхүүгээр  ахлуулсан ажлын хэсэг газар дээр нь ажиллаж, хальж хөлдсөн мөс, хөрснөөс дээж авч, шинжилгээнд өгч,   УСУГ-ын удирдлага , “Эм-Си-Эс”  компанийн ашиглалт хариуцсан  албаныханд  холбогдох үүрэг даалгаврыг өгчээ. Энэ дагуу  тэд бохироо цэвэрлэсэн ч ачуулсан  мөсөө Богд уулын зүүн талд аваачиж асган байгаль орчныг бохирдуулсан тул   холбогдох газруудад шаардлага хүргүүлээд байгаа аж. Мэргэжлийн хяналтын байгууллагын шинжилгээний дүнгээр худгийн ойролцоо тогтсон мөснөөс гэдэсний савханцар илэрч, эрүүл ахуй, аюулгүй байдлын шаардлага хангахгүй байгааг анхааруулжээ. Өнөөдрийн байдлаар  Мэргэжлийн хяналтын байгууллага болон Богдхан уулын хамгаалалтын захиргаанаас зөрчил гаргасан байгууллагыг тус бүр таван  сая төгрөгөөр торгож хариуцлага тооцоод байна. Хэдийгээр  холбогдох байгууллагуудад  хяналт шалгалт хийж, арга хэмжээ авсан ч зарим хэсгийн бохирыг цэвэрлээгүйгээс хайлж, Туул гол руу цутгаж байгаа.  Иймд цаашид хяналт, шалгалтыг үргэлжлүүлж, зөрчилтэй тэмцэх хэрэгтэй байна гэж Баянзүрх дүүргийн ИТХ-ын төлөөлөгч Б.Дэмбэрэл  хэвлэлийн хурлын үеэр онцоллоо. Эх сурвалж: www.polit.mn