Д.АРИУН Улсын дээд шүүхийн Ерөнхий шүүгч Ц.Зориг өнгөрсөн долоо хоногт өөрийн хүсэлтээр албан тушаалаасаа чөлөөлөгдсөн. Түүний оронд хэн Ерөнхий шүүгчийнх суудалд суух вэ гэдэг улс төрийн хүрээнд төдийгүй олон нийтийн анхаарал сонирхлыг ихээхэн татаж байгаа. Өнөөдөр Ерөнхий шүүгчийн нэр тодорч магадгүй гэдэг мэдээлэл байна. Зарим эх сурвалжийн мэдээллээр бол, Хөхийсүрэнгийн Батсүрэн энэ албан тушаалд очих магадлалтай нэр дэвшигчээр тодорч буй аж. Хөхийсүрэн овогтой Батсүрэн нь  1965 онд Увс аймгийн Улаангом суманд төрсөн. 54 настай, эрэгтэй. Х.Батсүрэн нь 1973-1983 онд Хэнтий аймгийн 10 жилийн дунд сургууль, 1984-1989 онд ЗХУ-ын Дотоод явдлын яамны Академи, 1997-1999 онд ХБНГУ-д Их сургуулийг тус тус төгссөн. Эрх зүйч мэргэжилтэй. 1989-1990 онд Хэнтий аймгийн Цагдан сэргийлэх ангид төлөөлөгч, 1990-1995 онд Баянгол дүүргийн Цагдаагийн хэлтэст төлөөлөгч, 2000-2004 онд Шүүхийн ерөнхий зөвлөлд мэргэжилтэн, 2004-2011 онд Нийслэлийн захиргааны хэргийн шүүхийн шүүгч, 2011 оноос тус Шүүхийн Ерөнхий шүүгчээр, 2012 оноос Улсын дээд шүүхийн шүүгчээр тус тус  ажиллаж байгаа. Шүүгчээр 15 жил ажиллаж байгаа нэгэн аж. Шүүх, прокурор, АТГ-ын дарга нарыг ҮАБЗ-ийн зөвлөмжөөр чөлөөлж огцруулдаг хуулийг санаачилж, хэлэлцүүлж батлахад хоёр өдөр хүрэхгүй хугацаа зарцуулсан. Хууль гарангуут Ерөнхий шүүгчийг өөрийнх нь хүсэлтээр чөлөөлж, Ерөнхий прокурор, орлогч прокурор нарыг  огцруулах шийдвэрийг өнгөрсөн  пүрэв гаригт буюу гуравдугаар сарын 28-нд Монгол Улсын Ерөнхийлөгч гаргасан. Ийм хурдтайгаар хийсэн чөлөөлөх, огцруулах үйл явцын дараа шинэ Ерөнхий шүүгч, шинэ прокурор нарыг томилох хурд нь ямар байх бол? Эх сурвалж: www.polit.mn