Үндэсний мэдээллийн төвд

С.Уянга

Увс аймгийн Хяргас сумын Марцын голын голдиролд  алтны олборлолт хийж байгаа талаар “Дэлхийн Монгол Ногоон хөгжил”, “Босоо Хөх Монгол” Төрийн бус байгууллагаас “Үндэсний мэдээллийн төв”-д  мэдээлэл хийлээ.Тус төрийн бус байгууллагынхан энэ сарын 4-нд Увс аймагт очиж газар дээр нь ажиллаад ирсэн байна. Энэ тухайгаа “Босоо Хөх Монгол” ТББ-ын Удирдах зөвлөлийн   дарга П.Шинжээравдан “Хүн, мал ундаалдаг Марцын голд алт олборлох зөвшөөрлийг Ашигт малтмалын газар “Цэрэнбадам” компанид 2013-2043 он хүртэл 30 жилийн хугацаатай өгсөн байна. Мөн хяналт тавих үүрэгтэй МХЕГ, БОНХЯ сумын Засаг даргад алт олборлохыг дэмжсэн албан бичиг хүргүүлсэн байдаг. Хятадын хөрөнгө оруулалттай “Цэрэнбадам” компанийн захирал эмэгтэй малчдад чихэр жимс  тараан өгч аргадаж бас аргалж, эсэргүүцсэн иргэдийг нь  дарамталдаг.Мөн сумын цагдаагийн албан  хаагч нь компанийн талд орж биднийг сүрдүүлсэн. Эх орныхоо газар шороог харийнханд худалдаж, төрсөн нутагтаа гадны хүмүүст дарлуулж байгаа энэ үйлдлийг хууль хяналтын байгууллагаар шалгуулна” гэв.  Тус компанийн үйл ажиллагааг зогсоохоор  Хяргас сумын малчид, ард иргэд гарын үсэг цуглуулж удаа дараа эсэргүүцэж аймаг, сумын удирдлагууддаа ханджээ. Гэвч аймгийн удирдлагууд алт олборлож байгаа компанийг дэмжиж, үйл ажиллагааг нь хэвийн явуулахыг сануулсан албан бичиг Хяргас сумын Засаг даргад явуулж дарамталжээ. Тус компанийг алт олборлосноос хойш голоос уусан нутгийн иргэдийн 20 гаруй мал үхсэн байна.  Иймд иргэд аргаа барахдаа “Дэлхийн Монгол Ногоон хөгжил”, “Босоо Хөх Монгол” Төрийн бус байгууллагаас тусламж хүсч,хамтран ажиллаач хэмээн хандсан байна.