Т.САЙХАН УИХ-ын гишүүн Т.Аюурсайхан цаг үеийн асуудлаар мэдээлэл хийлээ.  Түүний байр суурийн хүргэж байна. - Швейцариас авчирсан дансны хуулгатай холбоотой элдэв тайлбарууд хөвөрч байна.  Та албан ёсны мэдээлэл өгөхгүй юу? -УИХ-ын дарга Г.Занданшатар Швейцарь улсад албан ёсны айлчлал хийсэн. Айлчлалын бүрэлдэхүүнд явсан УИХ дахь оффшорын эсрэг бүлгийн ахлагчийн хувьд С.Баярцогттой холбоотой дансны хуулгыг авчирч, олон нийтэд тодорхой мэдээлэл хийсэн.  Үүний дараа үгүйсгэсэн, мушгин гуйвуулсан мэдээллүүд маш их явж байна. Ялангуяа энэ талаар ямар ч ойлголтгүй, ямар ч оролцоогүй, үүрэггүй хүмүүсийн ташаа мэдээлэл тараасан.  Би энэ чухал асуудал цаашид дарагдахаас болгоомжилж, мэдээлэл хийсэн.  Хуулийн байгууллагууд энэ мэдээллийг шалгахын тулд олон нийтийн хяналтад байх ёстой гэж үзсэн. -Дансны хуулгын талаар дэлгэрэнгүй мэдээлэл өгөхгүй юу? -Энэ зөвхөн С.Баярцогтын  таван данс биш.  Эдгээр таван дансны гүйлгээ хийсэн хугацаа нь 2008 оны есдүгээр сарын 30-аас 2013 оны арванхоёрдугаар сарын 31-ны өдрийг хүртэлх гүйлгээнүүд байгаа. 2008 гүйлгээг гэхэд Оюутолгойн  гэрээ  холбоотой байж болзошгүй гэсэн ойлголттой байгаа.  Үүний мөрөөр хуулийн байгууллага шалгаж байна. Тэгвэл 2008-2012 онд С.Баярцогт Сангийн сайдаар ажиллаж байсан.  Хоёрдугаарт 2012-2013 онд УИХ-ын дэд даргаар ажиллаж байсан. Энэ бүх хугацаанд нийт таван дансны орсон гарсан гүйлгээ байна гэхээр цаанаа олон эзэн холбогдогчтой байж болзошгүй байна. -Хуулийн байгууллагууд  шалгаж эхэлсэн үү? -Энэ асуудлыг улс төрийн нөлөөлөл, шахалтад автахгүйгээр бүрэн гүйцэт шалгаж тогтоох боломжийг хуулийн байгууллагад олгох ёстой. Яаж ийм боломж олгох вэ гэвэл мөн л одоо хуулиар зөвшөөрөгдсөн хэмжээнд хяналт шалгалтын ажлыг ил тод болгох журмаар нөлөөллөөс ангид байлгах боломжтой гэж үздэг. Швейцарийн холбооны улсаас иргэн С.Баярцогтын бүх гүйлгээний мэдээллийг өгсөн. Энэ бол АТГ, прокурорын байгууллагуудтай хийсэн албан ёсны харилцааны үндсэн дээр Монгол Улсад хүлээлгэн өгсөн. Хуулийн байгууллага хуулиа биелүүлэхэд бид улс төрийн дэмжлэг үзүүлэх ёстой. УИХ дахь оффшорын эсрэг бүлгээс Швейцарийн холбооны улсын өмгөөллийн товчоо, холбогдох банкинд удаа дараа хүсэлт илгээсэн. Энэ асуудлыг ил болгоход төрийн бус байгууллагуудаас идэвх санаачлагатай ажилласан. УИХ-ын гишүүн Б.Пүрэвдорж, О.Баасанхүү нар буруу мэдээлэл өгсөн байна лээ. Тэд оффшорын эсрэг хуруу байтугай хошуу нэмэрлэж байгаагүй хүмүүс. Тийм учраас энэ асуудлыг мэдэхгүй байх нь аргагүй. Айлчлалын хүрээнд энэ хүмүүс багтаад ямар ч үр дүнгүй, татвар төлөгчдийн мөнгийг үрэн таран хийгээд яваад ирсэн. Эх сурвалж:www.polit.mn