Ж.ЦОГ Mark Wahlberg Investment Group болон FOD Capital компаниуд хамтран фитнессийн фрэнчайзинг хийдэг F45 Training байгууллагын томоохон хувьцааг худалдан авахаар болжээ. Ингэснээр бизнесийнхээ салбарыг дэлхий олон улсад өргөжүүлэх зорилго тавьсан байна. 2012 онд Австралийн Сидней хотод байгуулагдсан энэ компанийн зах зээлийн үнэ өдгөө 450 сая ам.долларт хүрээд байгаа юм. F45 Training-ийн үүсгэн байгуулагч Роб Доич хэвлэлд өгсөн ярилцлагадаа компанидаа стратегийн хамтрагч хайж байсан талаараа дурджээ. Тэгвэл түүний түншээр Холливудын од Марк Уолберг ийн тодроод байна. “Марк бид хоёрын сонирхол яг таарч байна. Тэр угаасаа л фитнесээр хичээллэдэг, энэ спортыг ойлгодог хүн. Иймд манай брэндийг шинэ төвшинд аваачина гэдэгт итгэж байна” гэж тэрээр хэлэв. “Би бол фитнесийн фанат. Хаана, юу хийдгээсээ үл хамааран хүмүүс F45-д хичээллэх гэж чин сэтгэлээсээ ирж байгаа хүмүүсийг хараад л би энэ компанид хайртай болсон” гэж жүжигчин маань ярьсан байна. Тус компани нь дэлхийн 40 улсад 1500 орчим студи ажиллуулдаг бөгөөд Стэнфорд болон Техасын их сургуулиуд тэргүүтэй 20 гаруй хамтрагч түнш байгууллагатай. Хөрөнгө оруулагчид одоо Хойд Америк, Европ, Ази, Өмнөд Америк болон Германд бизнесийнхээ фрэнчайзингийг хийхээр төлөвлөж байгаа юм байна. Өдгөө 47 настай Уолберг фитнестэй холбоотой нэлээд хөрөнгө оруулалтад оролцсон нэгэн юм. Эх сурвалж: www.polit.mn