Л.ХЭРЛЭН Нийслэлийн Засаг дарга бөгөөд Улаанбаатар хотын захирагчаар саяхан томилогдоод буй С.Амарсайханыг  хот дээр томоохон  халаа, сэлгээ хийх гэнэ гэсэн мэдээ түүнийг ажлаа хүлээж авсны маргаашаас дуулдсан. Тэгвэл эхний ээлжинд тэрээр дөрвөн орлогчоо солино гэдгээ мэдэгдсэн сурагтай. Мөн тэднийг 30 хоногт багтаан ажлаа хүлээлгэж өг хэмээн хугацаа заасан гэх шивэр авир яриа Хангарьд ордноор таржээ. Одоо  Хотын даргын орлогчоор ажиллаж байгаа хүмүүс бол Су.Батболдын томилсон дарга нар юм. Дээр нь  С.Амарсайханыг  Хотын даргад өрсөлдөхөд дэмжээгүй гэх шалтгаан ч халаа, сэлгээ хийхэд нь гол  нөлөө үзүүлсэн байх талтай гэнэ. Дээрх мэдээлэл үнэн бол Хотын дарга 30 хоногийн дараа шинэ орлогч нараа томилох нь. Бас дээр нь  Нийслэлийн МАН дотор  Засаг даргын орлогч болохоор  горилогсдын ээлжит “марафон” эхэлнэ гэсэн үг. Хотын бүрэлдэхүүний тухайд Засгийн газрын 2016 оны 8 тоот тогтоолоор Нийслэлийн Засаг даргын Тамгын газар, Захирагчийн ажлын албаны бүтцийг баталсан байдаг. Үүнд  Нийслэлийн удирлагын бүтцийг нийслэлийн Засаг дарга  хоёр  орлогч,  хоёр  төслийн удирдагчтай байхаар баталжээ. Ингэхдээ төслийн удирдагчид  нь Нийслэлийн Засаг даргын орлогчийн статусаар ажиллана гэсэн  байдаг. Энэ  бүтцийн дагуу  Хотын өмнөх дарга Су.Батболд  Дэд бүтцийн хөгжлийн асуудал эрхэлсэн орлогчоор НИТХ-ын тэргүүлэгч П.Баярхүүг,  Ногоон хөгжил, агаарын бохирдлын асуудал хариуцсан орлогчоор НИТХ-ын тэргүүлэгч Ж.Батбаясгаланг, Гэр хорооллын хөгжил, нийгмийн асуудал хариуцсан төслийн удирдагчаар НИТХ-ийн төлөөлөгч Ш.Анхмааг,  ​Ядуурлыг бууруулах, хөдөлмөр эрхлэлтийн асуудал хариуцсан төслийн удирдагчаар нийслэлийн МАН-ын дэд дарга Д.Энхтөр нарыг томилсон байдаг. Эх сурвалж: www.polit.mn