Р.ОЮУН Хөвсгөл аймгийн Засаг дарга Л.Ганболдтой ярилцлаа.   -Сүүлийн үед аймагтаа хийж, хэрэгжүүлж байгаа ажлынхаа талаар товч танилцуулахгүй юу? -Хөвсгөл аймаг иргэдээ эрүүл, оюунлаг, ажилтай байлгах гол хүчин зүйлийг тодорхой болгон хэрэгжүүлэн ажиллаж байна. Энэ чиглэлээр тодорхой арга хэмжээ зохион байгуулж 2020 он гэхэд эрүүл мэндийн чиглэлээр Хөвсгөл аймгийнхаа бүх иргэнийг эрүүл мэндийн урьдчилан сэргийлэх үзлэг, оношилгоонд бүрэн хамруулна. Үүгээр дамжуулж өвчлөлийн эрсдэлийг урьдчилан сэргийлэх бөгөөд зайлшгүй эмчилгээ, үйлчилгээ хэрэгтэй нөхцөлд яаралтай тусламж үзүүлэх арга хэмжээг зохион байгуулж өнөөдрийн байдлаар 17 сум, хоёр ерөнхий эмнэлэг дээр хэрэгжүүлэн ажиллаж байна. 2020 он гэхэд өмнөө тавьсан зорилгоо бүрэн хэрэгжүүлнэ. ЖАЙКА олон улсын байгууллагатай хамтарч 0-18 сартай бүх хүүхдийг иж бүрэн урьдчилан сэргийлэх оношилгоонд хамруулж байгаа. Мөн жил бүр онцгой анхаарч байгаа асуудал бол шүдний өвчлөл. Энэ жил Засгийн газраас “Эрүүл хүүхэд-эрүүл шүд” хөтөлбөрийг хэрэгжүүүлж, мөн аймгаас алслагдсан сумдаас эхэлж тодорхой мэргэжлийн багийг шүд хөтөлбөрийн хүрээнд гаргаж хэрэгжүүлнэ. Энэ мэтчилэн эрүүл мэнд рүү чиглэсэн ажил их байна. Бүх сумын эрүүл мэндийн төвийг шинэ автомашинтай болгох ажлыг хийж өнөөдрийн байдлаар хоёр сумын автомашины асуудлыг шийдвэл бүх сум маань автомашины хувьд бүрэн шинэчлэгдэж байгаа. Энэ оноос ямар ч дуудлагад явсан Эрүүл мэндийн төв байнгын шатахуунтай, ямар ч өвчтөн ирж хэвтэхэд эм, тариа нь бүгд хангамжтай байх нөхцлөөр хангасан. -Тэгвэл оюунлаг байлгахын тулд ямар ажил хийж байна вэ? -Хөвсгөлчүүд оюунлаг. Тиймээс бид аль болох өөрсдөө ирээдүй болсон хүүхэд, залуучуудаа хүмүүжүүлж, сургаж, мэргэшүүлж, тэдэндээ ухааруулж, зааж зөвлөж байвал хүүхдүүд маань бүх зүйлийг тусгаж авна. Тиймээс бид зөв иргэн, зөв сайн байх үүрэгтэй, үүргээ биелүүлэх ёстой. Байшин барилга барихаас гадна хүнийхээ зүрх, тархинд нь оюуны хөрөнгө оруулалт хийх, зөв хүмүүжлийг суулгах, бусдыг хүндлэх, өнөөдрийн шинжлэх ухаан, хэрхэн дэлхийн хэмжээнд өрсөлдөх чадвартай байх энэ бодлого, шийдвэрийг хэрэгжүүлэхээр ажиллаж байгаа гэж хэлмээр байна. Мөн шинэ технологийн шинэ ажил үйлчилгээг боловсролын салбартаа хэрэгжүүлж дээрээс нь боловсролын салбарынхныгаа чадавхижуулах ажлыг зохион байгуулж, хэрэгжүүлж байгаа. Хөвсгөл аймгийн хүүхдийн элчийн хувьд хүүхдэд хэрэгцээтэй ямар ажил байна түүнд бүх зүйлээ зориулж, бүхнийг хүүхдийн төлөө гэсэн зорилго тавьдаг. Өөрөөр хэлбэл, хүүхдийн эрх ашиг, хүүхдийн зөрчил гаргасан хэнийг ч уучилж чаддагүй, шууд хариуцлага тооцдог. Энэ оныг аймгийн Засаг даргын зүгээс “Хүүхэд хамгаалал, өрхийн хөгжлийг дэмжих жил” болгон зарласан. Тиймээс бүх хүүхдээ хаана, юу хийж байгааг олж харна. Зургаан настай хүүхэд оюуны спортоор дэлхийн аварга болж байна. Мөн 70 настай ахмад ч гэсэн өнөөдөр дэлхийн аварга боллоо. Зургаан настай балчираас 70 настай ахмад дэлхийг тэргүүлнэ гэдэг хөвсгөлчүүд оюуны бядтай, боломж байна гэдгийг хэлмээр байна. Аймагтаа анх удаа гавьяат багш Д.Цогтоогийн нэрэмжит газарзүйн олимпиадыг цахимаар зохион байгуулахад хүүхдүүд их амжилттай оролцсон. -Иргэдээ ажилтай, орлоготой болоход нь юуг анхаарч байна? -Өнөөдрийн байдлаар 8260 гаруй иргэн ажлын байраар хангагдсаны 6100 нь байнгын ажлын байраар хангагджээ. Өнгөрсөн жил 1575 иргэн ажлын байртай болж байсан. Өнөөдөр Хөвсгөл аймагт бүртгэлтэй, ажил хайж байгаа 1400 орчим ажилгүй иргэн байна. Энэ онд бүтээн байгуулалтын ажил эхэлнэ. Тиймээс ажил хайж байгаа иргэд, залуучууд ажлыг голохгүй бол Хөвсгөл аймаг энэ онд ажилгүйдэл 0 болно. Тухайлбал, 80 гаруй барилга байгууламжийн ажил эхэлж байгаа. Энэ ажлуудыг 1-2 жилийн хугацаанд хийж дуусгана. Эх сурвалж: “Зууны мэдээ” сонин 2019.3.12 № 51 (6018)