Т.САЙХАН УИХ-ын дарга Г.Занданшатар гуравдугаар сарын 11-15-ны өдөр Швейцарийн холбооны улсын Үндэсний зөвлөлийн даргын урилгаар тус улсад албан ёсны айлчлал хийхээр өнөөдөр  /03.11/ мордлоо. Тэрээр  Швейцарийн холбооны улсын Үндэсний зөвлөлийн дарга Марина Кароббио Гүшэттитай албан ёсны хэлэлцээ хийж, тус улсын парламент-Үндэсний зөвлөлийн үйл ажиллагаа, парламентын дэгийн зохицуулалттай танилцана. Мөн энэ үеэр тохиож буй Монгол Улс, Швейцарийн холбооны улс хооронд дипломат харилцаа тогтоосны 55 жилийн ойн арга хэмжээнд оролцох юм. Мөн УИХ-ын дарга Г.Занданшатар тэргүүтэй Монголын парламентын төлөөлөгчдийн бүрэлдэхүүнд Төрийн байгуулалтын байнгын хорооны дарга Д.Лүндээжанцан,  Өргөдлийн байнгын хорооны дарга М.Оюунчимэг, Улсын Их Хурал дахь Монгол, Швейцарийн парламентын бүлгийн дарга Ц.Гарамжав, Монгол, Швейцарийн парламентын бүлгийн гишүүн Л.Болд, Улсын Их Хурал дахь АН-ын бүлгийн дэд дарга Б.Пүрэвдорж, Т.Аюурсайхан, О.Баасанхүү нар  багтжээ.

Ерөнхий сайд Өмнөд Суданыг зорив

НҮБ-ын мандаттай Өмнөд Судан улс дахь энхийг сахиулах ажиллагаанд манай улсын VIII ээлжийн цэргийн багийнхан үүрэг гүйцэтгэж байгаа. Тус улсад үүрэг гүйцэтгэж буй цэргийн бие бүрэлдэхүүнтэй уулзахаар Ерөнхий сайд У.Хүрэлсүх тэргүүтэй албаныхан Өмнөд Судан улсыг зорьжээ. Ерөнхий сайдын айлчлалын багт батлан хамгаалах салбарынхан болон хэвлэл мэдээллийнхэн багтаж байна. Манай улс 2012 оноос тус улсад энхийг сахиуиах ажиллагаанд оролцож эхэлсэн төдийгүй 850 хүний бүрэлдэхүүнтэй найм дахь ээлжийн батальон үүргээ амжилттай гүйцэтгэж байгаа юм. Өмнө нь Ерөнхийлөгч асан Ц.Элбэгдорж 2013 онд Өмнөд Суданд айлчилж, энхийг сахиулах ажиллагааны явцтай танилцаж байсан юм. Эх сурвалж:www.polit.mn