Н.ОД

Монголбанкны ерөнхийлөгч Н.Золжаргал үндэсний ганц банкныхаа үүдийг хааж өрхийг бүтээх шийдвэр гаргалаа. Эрхэм Ерөнхийлөгчийн үзэгний үзүүрт торох ч үгүй хувь заяагаа шийдүүлсэн банк бол “Хадгаламж”. Улс даяар салбар нэгжтэй, үйл ажиллагаа нь жигдэрсэн энэ том банкийг Төрийн банктай нэгтгэх шийдвэрийг Н.Золжаргал гаргасан. Яг одоо нэгтгэж нийлүүлсэн хоёр банкийг хэнээр удирдуулах вэ гэдгийг Монголбанкин дээр ид ярилцаж байна.

Үйл ажиллагаа нь жигдэрсэн үндэсний хэмжээний банкийг татан буулгаж тарааж дампууруулах шийдвэр гаргахад чухам юу нөлөөлсөн бэ гээд хөөгөөд үзвэл тун ч сонирхолтой учиг олдох юм билээ. Монголбанкны Ерөнхийлөгч Засгийн газрын дэд хөтөлбөр хэрэгжүүлэх нэрээр дөрвөн их наяд төгрөгийг цаасаар гарган эгээ л Султан хаан шиг баруун солгойгүй цацсан. Ингэхдээ ганцхан “Жаст” группэд л гэхэд мах, шатахууны үнийг тогтворжуулах нэрээр 94 тэрбумыг өгсөн байдаг. Засгийн газрын хөтөлбөр хэрэгжүүлж үндэсний компанийг дэмжсэн дүртэй ч яг үнэндээ энэ нь Ш.Батхүү, Н.Золжаргал хоёрын ханцуй дотроо хийсэн наймаа байжээ. Чухам хэн нь хэдийг авсныг ил гаргахгүй нь тодорхой энэ наймааны золиосонд “Хадгаламж” банк явж байгаа гэнэ. Тарааж цацсан тэрбумаар тоологдох тэр их мөнгийг татвар төлөгчдөөр төлүүлэх уран аргыг Н.Золжаргал Ерөнхийлөгч бодож олсноор Монголд “Хадгаламж” гэж банк байхгүй болж буй юм байна.