Ц.БАЯР МҮХАҮТ-ын XX их хурал Соёлын төв өргөөнд үргэлжилж байна. Дүрэм ёсоор ирэх дөрвөн жилийн үйл ажиллагааг үргэлжлүүлэн авч явах шинэ удирдлагыг сонгоно. Энэ удаа Танхимын тэргүүлэгчид, Удирдах зөвлөл, хяналтын зөвлөлөөс гадна гишүүн аж ахуйн нэгжүүдийг төлөөлж хот, хөдөөгийн 600 гаруй төлөөлөгч оролцож байна. Ээлжит их хурлаар МҮХАҮТ-аас болон хяналтын зөвлөлөөс 2015-2018 онд хийж гүйцэтгэсэн ажлын тайланг хэлэлцсэн юм. Мөн танхимын дүрэмд нэмэлт, өөрчлөлт оруулах, удирдах багийн сонгуулийг явуулна. Санхүүгийн болон үйл ажиллагааны тайланг хэлэлцэх үеэр хурал нь хэвлэлийнхнээс хаалттай болсон юм. Энэ үеэр нэр дэвшигч Б.Жаргалсайханаас хурлын үйл ажиллагааны талаар тодруулахад ”Хуралд хөдөө орон нутгаас 200 төлөөлөгч оруулж ирж будлиан тарьж байна. Орон нутгаас ирсэн иргэд сонгуулийн ажилд бусдын захиалгаар оролцдог. Эд хэний захиалгаар ямар даалгавраар орж ирэв гэдэг хардлага төрж байна. Үнэхээр танхимын ажлыг өөд татъяа, бизнес эрхлэгчдийн үйл ажиллагааг дэмждэг байгууллага болоосой гэж орж ирэв үү. Эсвэл нэг даргын даалгавраар ерөнхийлөгчийг сонгохоор орж ирэв үү гэдэгт эргэлзэж байна. Аливаа сонгуулийг хуулийн хүрээнд явуулах ёстой. Харамсалтай нь энэ удаагийн хурал хуулиараа явагдахгүй боллоо. Өөрийгөө дэмжүүлэхээр орон нутгаас хүмүүс хөлсөлж авчирч байна. Монголд сонгууль хэзээ шударгаар явагдах юм бэ” гэсэн юм. “МонФарм Трейд” компанийн захирал С.Буяннэмэх “Гүйцэтгэх хурал, хяналтын хорооны тайланг сонслоо. Өнгөрсөн дөрвөн жилийн хугацаанд бодлогын болон үйл ажиллагааны алдаатай олон зүйл байна. Компани бизнесменүүдийн тэгш оролцоог хангаагүй. Хэт их монофоль компаниудыг оролцуулж одоогийн удирдлага өөртөө оноо авч дэмжүүлэх, тэдэнд үйлчлэх байдлаар үйл ажиллагааг явуулсан нь  Хяналтын хорооны даргын тайлангын илтгэлд  дурдагдсан. Бизнес бол тэгш эрхийн зарчим дээр суурилдаг. Том компаниуд танхимын гол цөм болдог. Танхим тэдэнд үйлчилдэг. Тэдэнд нийцсэн хууль эрх зүйн орчинг бий болгодог. Бусдад давуу байдал олгохгүйгээр асуудлыг шийддэг нөхцөл байдал үүссэн. Үүнээс болж анхдагч бизнес эрхлэгчдийн эрх ашиг хөндөгдөж тэдний бизнес өргөжиж томрох нь тодорхойгүй болсон” гэв. Хот, хөдөөгийн аж ахуйн нэгжийн 600 орчим төлөөлөгч хуралдаж байна. Эх сурвалж:www.polit.mn