Т.САЙХАН Удтал даргагүй байсан Улаанбаатар өнөөдөр удирдлагатай болно.  НИТХ-ын хуралдаан эхэлж, хотын даргын томилгооны асуудлыг хэлэлцэж эхэллээ.  НИТХ дахь МАН-ын бүлэг Хотын удирдлагыг авах гэж улайрч байна.  Тэд өмнөх хуралдаанд заалнаас нэр дэвшиж өрсөлдсөн С.Мөнхчулуунд ялагдсан. Алдаагаа дахин давтахгүйн тулд бүх асуудлыг хайрцаглаж оруулж иржээ.  Тухайлбал тооллогын комисс батлах, нэр дэвшүүлэх явцыг олонхийн саналаар хүчээр шийдээд явж байна.  Цөөнхийн гишүүдийн гаргасан горимын  санал унасаар байна. МАН-ын бүлгийн дарга Р.Давга "Манай нам тооллогын комисст бүлгийн таван гишүүнийг оруулах улс төрийн шийдвэр гаргасан" гэж хэлээд онигоонд оров.  Энэ нь цаагуураа өнөөдрийн Хотын даргыг томилох асуудлыг хүчээр явуулж, С.Амарсайханыг томилохоор болсон гэдгийг зарлачихсан хэрэг болов.  Түүнчлэн тооллогын комисст МАН-ын Ерөнхий нарийн бичгийн дарга Амарбаясгалан орсон нь ашиг сонирхлын зөрчилтэй болсон гэдгийг хэлсэн. Сөрөг хүчнээс Хотын даргыг сонгох  асуудлыг хуулийн дагуу явуулахгүй бол хуулийн байгууллагад энэ асуудал очно гэдгийг хэлэхэд хуралдааны даргалагч Б.Батнасан "Яахав яахав" гэж хэлээд сууж байна.  Мөн НИТХ-ын төлөөлөгчдийн суудлыг хуралдааны өмнө сольжээ.  Энэ нь гишүүдээ хянах, улмаар С.Амарсайханы эсрэг санал өгсөн гишүүдийг айлган сүрдүүлэх зорилготой гэдгийг төлөөлөгчид хэлж байна.  Ийнхүү  цайчихсан НИТХ-ын хуралдаанаар Хотын даргыг томилох гэж байна. Эх сурвалж:www.polit.mn