Т.САЙХАН Ерөнхий сайд, МАН-ын дарга У.Хүрэлсүх ардчилсан зарчим, сонгох сонгогдох эрхийг уландаа  гишгэхдээ онцгой сайн юм.   Тэрээр  үүнийгээ хэд хэдэн удаагийн үйл явдал дээр батлан харуулаад байна.   Ард түмний сонгох эрх, улстөрчийн сонгогдох эрх У.Хүрэлсүх түүний тойрон хүрээлэгчдийн эрх ашгаас дор болчихлоо.  Хамгийн сүүлийн жишээ гэхэд Хотын даргын томилгоотой холбоотой асуудал байна.  Энэ сунгаанд заалнаас нэр дэвшиж өрсөлдөж, ялснаараа МАН-ын гишүүн,  НИТХ-ын төлөөлөгч С.Мөнхчулуун өнөөдөр буруутан  болж хувирлаа.  Түүнийг Хотын даргаар батламжгүй байгаад зогсохгүй, намаасаа хөөх арга хэмжээг хүртэл авлаа. Уг нь  С.Мөнхчулуун МАН-ын гишүүдээс биш нийслэлийн иргэдийн тодорхой хэсгээс дэмжлэг аван сонгогдсон  иргэдийн төлөөлөгч.  Түүнд аливаа сунгаанд өрсөлдөж, сонгогдох эрх бий.  Гэсэн ч Ерөнхий сайд У.Хүрэлсүх С.Мөнхчулууны сонгогдох эрхийг уландаа гишгэв.  Түүнээр ч зогсохгүй,  С.Мөнхчулууныг сонгосон хэдэн мянган иргэний сонголтыг хүндэтгэж огт харсангүй. Хүний эрх, ардчилсан зарчим биш намын эрх ашгийг нэгт тавьсан Ерөнхий сайд, намын дарга гэдгээ харуулсаар байна. Үүний өмнө  тэрээр Хэнтий аймгийн 42 дугаар тойрогт явагдах байсан нөхөн сонгуулийг мөн л ингэж хүчээр дарж, болиулсан.  Тэнд байгаа 11 мянган иргэний  сонгогдох эрхийг хаасан.  Хэнтий аймгийн 42 дугаар тойргийн иргэд одоо ч төрд төлөөлөлгүй хаягдсан бүс хэвээр байна.  Ерөнхий сайд,  МАН-ын дарга У.Хүрэлсүхийн  балгаар.  Тэрээр энэ сонгуулийг хойшлуулахдаа улстөрчийн хувьд ёс зүйгүй, дэндүү бүдүүлэг арга хэрэглэсэн байдаг юм. Өөрийн хамаарал бүхий иргэнээр хуулийн байгууллагад гомдол гаргуулж, түүндээ нөлөөлөх байдлаар сонгуулийг будлиантуулсан.  Ингэж тэр өөрийн, намын эрх ашгийг хамгаалахын тулд 11 мянган иргэний сонгох эрхийг мөн л уландаа гишгэж байлаа. Ерөнхий сайд, МАН-ын дарга У.Хүрэлсүх ардчилсан зарчим, сонгох сонгогдох эрхийг уландаа  гишгэхдээ онцгой сайн юм. Эх сурвалж:www.polit.mn