[caption id="attachment_56682" align="aligncenter" width="236"] Цэрэнпилийн Балхаажав[/caption] Багшийн албан тушаал Аргын тооллын 45 онд Албаны хаалга татах боллоо. Арван долоон нас минь Анхны багшаар томилогдлоо Бичигт сургах, сурах засгийн зарлиг Бид бүхнийг нийтээр хамарлаа. Шинэ үсэг хэмээх кирилийг Шийдвэр ёсоор заавал сурна Босоо монгол бичгийг Болсон болоогүй бас сурна Давхар сургалтын хатуу үүрэгт Дайчилж биеэ бэлтгэлээ Ээж аавтай адил насны Эрхэм хүндэт иргэд цуглана Сумын төвийн гэрэн байранд Сурагч, багш ажлын гараагаа эхэлнэ Тал талаас багшаа, багшаа гэнэ Тамираа тасартал дунд нь гүйнэ 45 хоногт дөнгөн данган уншуулж бичүүлнэ Дөрөө хангинаж дараачийн ээлж ирнэ. Үүргээ сайн биелүүлсэн гэж дээрээс Үнэмпэх, 10 төгрөгөөр шагнуулж билээ.   Хүн нь хүнээ тахихуйд Баячууд олширвол бардам зан ихэсдэг ч Бас ч гэж өгөөмөр, өглөгч нь цөөнгүй бий. Малаа маллуулах зарцтай нь багагүй ч Манай энэ тэр гээд аргалж чадагч цөөнгүй бий Цээжээ дэлдэж чихээ соотойлгогч чинээлэг олон ч Цэлмэг тэнгэр шиг цагаан сэтгэлтэн цөөнгүй бий Хов жив, хоосон чалчаа хааяагүй их ч Хорыг дарагч, хотол түмэн дэндүү олон бий Авлига, хээл хахууль бүхнийг хоргоох нь үлэмж ч Авсанд ортлоо үнэнч явахыг хичээгчид цөөнгүй бий Зуйгуйл тэнэмэл үг, зусар бялдууч зан газар сайгүй ч Зугтаж хөндий байх энгүй төвшин авиртан цөөнгүй бий Бусдын аманд орчих гээд булгиж цалхигчид элбэг ч Бузар буланд өртөлгүй төлөв томоотой цөөнгүй бий Завхай зайдны заваан амьдралд дурлагч байдаг ч Залуураа зөв барьж ёс төрийг бодогчид цөөнгүй бий Өнгө зүс алаг үзлээр дүүрэн хүн байдаг ч Өөрийг хэнээс ч асуулгүй залуурдагч цөөнгүй бий Аж төрөх ухаандаа агаараас хишиг горьдогч байдаг ч Арга эвийн хүчээ учраа олоход зориулагчид цөөнгүй.