Т.САЙХАН Сангийн яамнаас зарим сангуудад хийсэн шалгалтын  талаар Засгийн газрын өнөөдрийн /02.20/ хуралдаанд танилцуулсан.  Засгийн газрын зээл олгодог сангуудад голлон хийсэн талаар Сангийн сайд Ч.Хүрэлбаатар танилцууллаа. Тэрээр “Тариалан эрхлэлтийг дэмжих санг сайтар шалгасан. Нэлээдгүй зөрчил илэрсэн. Үүнийг засч залруулах, үүнийг олон нийтэд ил болгох талаар ярьсан. “Мал хамгаалах сан”, “Хөдөлмөр эрхлэлтийг дэмжих сан”, “Боловсролын зээлийн сан”, “Авто замын сан” зэрэг нэлээд хэдэн санд хийсэн шалгалтын дүнг танилцуулсан.  Засгийн газрын гишүүд тайлантай танилцаад ирэх долоо хоногт Засгийн газрын тогтоол хэлбэрээр гаргахаар шийдвэрлэлээ гэсэн. Мөн тэрээр “ЖДҮХС”, “Тариалан эрхлэлтийг дэмжих сан”, “Мал хамгаалах сан” гээд зээл олгодог гурван сангаас гурвуулангаас нь ч зээл авсан аж ахуй нэгж байна. Хоёр сангаас зээл авсан 319 аж ахуй нэгж байна. Энэ бүх мэдээллүүд нь Монголбанкны зээлийн мэдээллийн санд тусдаггүй учраас зээлийн эргэн төлөлт нь тааруу байна. 130 тэрбум төгрөгийн хугацаа хэтэрсэн өр байна. Сүүлийн хоёр сард зээл төлөлтийг төлүүлэх ажлыг зохион байгуулсан. “Тариалан эрхлэлтийг дэмжих” сан байгуулагдснаас хойш 16 мянган аж ахуйн нэгж хоёроос дээш удаа зээл авсан байна. Маш их давхцалтай байна. Нэг сангаас нь зээл аваад нөгөө сангийхаа зээлийг төлөх зүйлүүд ч нэлээд гарсан. Энэ нь Монголбанкны мэдээллийн сантай уялддаггүй, ил тод биш, Шилэн дансанд ордоггүй нь гарсан зөрчлүүдийн суурь болсон гэж үзэж байгаа. Тиймээс бүх сангуудыг ил тод болгох, олон нийтийн оролцоог бий болгоно” гэлээ. Түүчнлэн зарим сангуудыг татан буулгах саналаа танилцуулгадаа дурджээ. Шалгалтын тайланг ирэх   долоо хоногт олон нийтэд ил болгох учраас хүссэн хүн бүхэн шалгалтын материалтай танилцах боломжтой юм байна. Эх сурвалж:www.polit.mn