Т.САЙХАН Хотын даргыг сонгох НИТХ-ын хуралдаан энэ сарын 22-нд болохоор яригдаж байна.   Энэхүү сунгаанд С.Амарсайхан,  С.Мөнхчулуун нар дахин өрсөлдөх талаар яригдаж байгаа.  Мөн одоогийн Хотын даргын үүрэг гүйцэтгэгч Ж.Батбаясгаланг  шинээр орж  ирж магадгүй гэсэн яриа ч байна.  Өмнөх сунгаанд МАН-ын удирдах зөвлөлөөс  С.Амарсайханыг томилох саналаа НИТХ руу хүргүүлсэн байдаг.  Гэсэн ч НИТХ-ын гишүүд нууц санал хураалтаар заалнаас нэр дэвшиж өрсөлдсөн С.Мөнхчулууныг Хотын даргад дэмжсэн. НИТХ-ын дарга С.Амарсайхан ингэж эхний сунгаад ялагдсан байдаг.   Мөн энэ үеэс С.Мөнхчулууны зовлон эхэлсэн гэхэд болно.  НИТХ-ээс  түүнийг батламжлуулах хүсэлтийг Ерөнхий сайдад хүргүүлж, батламжлах уу үгүй юу гэдэг асуудал бараг л сарын хугацаанд яригдсан. Гэсэн ч Ерөнхий сайд У.Хүрэлсүх өнгөрсөн баасан гаригт түүнийг батламжлахгүй гэдэг шийдвэрээ хүргүүлсэн байдаг.  Бүүр цаашлаад намаасаа  ч хөөчихсөн. Одоо Хотын даргын сунгаанд тэр НИТХ-ын жирийн гишүүний хувиар өрсөлдөх юм.   С.Мөнхчулуунд ялагдсан С.Амарсайханы хувьд намынхаа удирдлагаас ямартай ч дэмжлэг авч энэ албан тушаал зүтгэж байгаа.  Мөн одоогийн Төрийн тэргүүн Х.Баттулгатай худ ургийн холбоотой гэж яригддаг.  2012 оноос хойш НИТХ-ын Төлөөлөгчөөр хоёр дахь удаагаа сонгогдон ажиллаж байна.  НИТХ-ын Тэргүүлэгч, Хот байгуулалт, дэд бүтцийн хороо, Санхүү, Төсөв, эдийн засгийн хороо болон “Ухаалаг Улаанбаатар” Хөгжлийн хорооны гишүүн, Нийслэлийн Авто Худалдааны төвийн ТУЗ-ын гишүүнээр ажиллаж ирсэн бөгөөд 2016 оноос НИТХ-ын Санхүү, Төсөв, эдийн засгийн хорооны дарга, өмч хувьчлалын комиссын гишүүнээр тус тус ажиллаж байсан юм. 2017 онд АТГ-т хүргүүлсэн хөрөнгө орлогын мэдүүлэгтээ 10.767 тэрбум төгрөгийн үнэ бүхий  харш, 225 сая төгрөгийн үнэт эдлэл, 65 сая төгрөгийн хадгаламж, бусдаас 4.5 тэрбум төгрөгийн авлагатай, “Оюуны Ундраа” групп, “МСГ” ББСБ-ын 37.052 тэрбумын төгрөгийн үнэлгээ бүхий хувьцаа эзэмшдэг хэмээн мэдүүлж байжээ. Мөн “Зайсан Хилл” цогцолбор баригдсан 4.41 га газрыг С.Амарсайханыг эзэмшдэг хэмээн ярьдаг билээ. Эх сурвалж:www.polit.mn