Л.Хэрлэн Эрх мэдэл, албан тушаалаа урвуулан ашиглаж Хөгжлийн банкны хөрөнгөөс завшсан,  хээл хахууль авсан зэрэг хэрэгт холбогдсон Эрчим хүчний сайд асан М.Сономпилийн гэм буруутай, эсэхийг  шүүсэн  Хан-Уул дүүргийн Эрүүгийн хэргийн анхан шатны шүүхээс түүнийг дахин шалгуулахаар  хэргийг прокурорт буцаасан байна. М.Сономпил  тус  салбарын  сайдаар ажиллаж байхдаа яамныхаа эрх бүхий албан тушаалтнуудад нөлөөлж,  ЭХЯ-наас Дарханы дулааны цахилгаан станцын үнс хадгалах сан барих тендерт “Хотгор зам” ХХК-ийг ялуулсан бөгөөд тус  компаниас “Залуу Монгол”-ынхоо дансаар 264 сая төгрөгийн хахууль авсан хэмээн буруутгагдаж буй юм. Түүнчлэн  эрх мэдэл албан тушаалаа урвуулж, “Амгалан” дулааны станцыг 60 сая ам.доллароор барьж ашиглалтад оруулах санал гаргасан БНХАУ-ын “Чайна машинери инженеринг корпорац” компанид  давуу байдал олгосны зэрэгцээ  тендерт анх ирүүлсэн үнийг нэмж, гэрээ байгуулах явцад үнийн дүнг 75.9 сая ам.доллар  болгож  өсгөн  тухайн гүйцэтгэгчийг үндэслэлгүйгээр татвараас чөлөөлсөн гэх хэрэгт шалгагдаж байгаа юм. Шүүх хурлыг Хан-Уул дүүргийн Эрүүгийн хэргийн анхан шатны шүүхийн шүүгч Д.Алтанжигүүр даргалж, гэрчээр Ерөнхий сайд асан Н.Алтанхуяг, Эрчим хүчний сайд байсан Д.Зоригт, Хөгжлийн банкны Төлөөлөн удирдах зөвлөлийн  дарга асан Б.Шинэбаатар нарыг байлцуулан  хэлэлцсэн хурал  өчигдөр 20.10 цагийн үед завсарлаж, 21.00 цагт тогтоолоо танилцуулсан байна. Шүүхийн хэлэлцүүлгийн явцад зарим  асуудлаар мөрдөн шалгах ажиллагаа хийлгэх шаардлагатай гэж үзэж,  М.Сономпилд холбогдох хэргийг прокурорын хяналтад буцаах шийдвэрийг гаргажээ. Эх сурвалж:www.polit.mn