Г.ГЭРЛЭЭ

“Хүсэл зорилгоо нэгтгэе” үндэсний хөдөлгөөнөөс өчигдөр хэвлэлийн хурал хийлээ. Тэд сүүлийн үед хууль, шүүхийн салбарт үүсээд буй цаг үеийн асуудалд байр сууриа илэрхийлсэн юм.  Тус хөдөлгөөний тэргүүн Х.Бат-Ялалт  “Хууль зүйн сайд Х.Тэмүүжин  насанд хүрээгүй охинтой холбогдож хууль зөрчсөн талаар олон түмэн мэдлээ. Х.Тэмүүжин сайдыг өмгөөлөгч нь хууль бусаар хамгаалан хаацайлж байна.  Хуулийн  хариуцлага тооцсонгүй. Тэгвэл  эрхэм сайд саяхан өөрөө хууль зөрчин  шоронд нэвтэрч нам нэгтнүүдээ эргэлээ.  Манай  хөдөлгөөн  шударга ёс, хууль дүрмийг сахин биелүүлдэг. Бид ийм хууль бус үйлдлийг хараад сууж чадахгүй.  Шинэчлэлийн гэх хуурамч нэртэй  Засгийн газар бүрэн бүрэлдхүүнээрээ огцрох, гэмт хэрэгт холбогдсон, эрх мэдэл, албан тушаалаа хэтрүүлэн Монгол Улсын хууль тогтоомжийг удаа дараа зөрчсөн сайд нарыг Монгол Улсын хууль хяналтын байгууллага шалгаж олон нийтийн өмнө ил тод шүүх ёстой гэж үзэж байна” хэмээсэн юм. Мөн ард түмнээ уриалан дуудаж тэмцэх болно гэдгээ “Хүсэл зорилгоо нэгтгэе” үндэсний хөдөлгөөн мэдэгдэв.