Х.ОЮУНБОЛД АНУ-ын  Төрийн департаментын хэвлэлийн төлөөлөгч Хизер Науэрт НҮБ-д тус улсыг төлөөлж суух байнгын төлөөлөгчөөр нэрээ дэвшүүлэхээс татгалзсан байна. Ерөнхийлөгч Дональд Трамп энэ сарын 7-нд түүний нэрийг   энэ албан тушаалд дэвшүүлэхээр шийдвэрлэснээ зарлаад байсан юм. Харин АНУ-ын Төрийн департамент гаргасан мэдэгдэлдээ “Хизер Науэрт НҮБ-д суух байнгын төлөөлөгчид нэрээ дэвшүүлэхээс татгалзсан. Тиймээс ерөнхийлөгч удахгүй шинэ байнгын төлөөлөгчийн албан тушаалд нэр дэвшигчийг зарлана” гэж дурдсан байна. Хизер Науэрт түүнийг энэ албан тушаалд нэрийг нь дэвшүүлсэнд ерөнхийлөгч Дональд Трамп, Төрийн нарийн бичгийн дарга Майк Помпео нарт талархаж байгаагаа илэрхийлснийг мэдэгдэлд нэмж дурджээ. Хэвлэлийн төлөөлөгч “Сүүлийн хоёр сар миний ойр дотнын хүмүүст хэцүү сар байлаа. Тиймээс гэр бүлийн ашиг сонирхлыг харгалзан үзэж нэрээ татсан” гэж мэдэгджээ. Харин үүний өмнө ерөнхийлөгч Дональд Трамп Хизер Науэртийг энэ ажилд нухацтай хандах хүн гэж үзсэнээс гадна сайн нэр дэвшигч гэж тодорхойлсон ажээ. Хизер Науэрт нь Төрийн департаментын хэвлэлийн төлөөлөгч болохоосоо өмнө “Фокс” телевизийн уулзалтын нэвтрүүлгийн хөтлөгчөөр ажиллаж байсан юм. Эх сурвалж: “Зууны мэдээ” сонин 2019.2.18 № 32 (5999)