Э.ОДОНТУЯА

Бурхан багшийн номын хүрд эргүүлсэн Их Дүйчэн өдөр өчигдөр буюу зуны адаг сарын шинийн 4-нд тохиолоо. Одоогоос 2540 –өөд жилийн өмнө хүн төрөлхтний дунд бурхны шашин анх үүссэн гэдэг. Түүнээс хойш хүмүүс тэнгэр бурханд залбиран мөргөж, бурхан багшид хувь заяа, ирээдүйн амьдралаа даатгасаар иржээ. Энэ өдрийн хүрээнд “Ном дор мөргөм үү Ном дор итгэм үү” эрдэм соёлын үйл ажиллагааг Үндэсний номын сан “Их майдар” төслийнхөн амжилттай зохион байгуулсан юм. Үүнээс хамгийн сонирхолтой нь Үндэсний номын санд урьд нь ард түмэнд үзүүлж байгаагүй, маанийн судруудыг дэлгэсэн байв. Тухайлбал, 108 алтан, мөнгөн үсгийн Ганжуур данжуур, Орчин үеийн Сандуйн жүд болон бусад хосгүй, үнэт судруудыг тавьжээ.  Тэдгээр бүтээлийг хүмүүст үнэгүй үзүүлж, адис авч, залбирах боломжийг олгож байлаа. Мөн энэ үед Тусгаар тогтнолын талбайд  “Сандуйн жүд” судрын хураангуй лүнг хүртээсэн юм. Сандуйн жүд нь нууц бүхний хураангуй гэх Сандуй бурхны тарни юм. Энэ тарнийг уншихад бурхны “лагшин, зарлиг, таалал” буюу “бие, хэл, сэтгэл” зэргийг нэг дор хураасантай дүйцдэг ажээ. Энэхүү тарнийг чин сэтгэлээсээ залбиран уншсан сонссон хэн бүхэнд эрдэм соёлын үр дэлгэрдэг номтой юм байна.