Ч.ГАНТУЛГА Маргааш гэгээн хайрын өдөр буюу Валентины баяр болно. Хэрэв энэ өдөр хайртыгаа хэрхэн баярлуулахаа мэдэхгүй байгаа бол анхаарлаа хандуулаарай. Маргааш болох үзвэр үйлчилгээний хуваарийг танд хүргэе.   

“Lemons”-той өнгөрүүлэх 50 хос

Маргааш та хайрттайгаа “Туул” рестораныг зориорой. Учир энэ үдэш зөвхөн та хоёрт зориулсан “Valentina special night” шоу болно. Тоглолтод “Lemons” хамтлаг ая дуугаа өргөхөөс гадна жүжигчин Амараа, Хану гэсэн уран бүтээлчид та хоёрыг хөгжөөнө. Мөн баяр дээр баяр нэмж, цэцгийн баглаа, амтат дарсаар дайлахаас гадна мэргэжлийн гэрэл зурагчин хайраа илчлэх нандин хормыг тань гэрэл зурагт мөнхлөх юм байна. Тасалбарын үнэ: 200000 /2 хүн/  

Б.Баярцэцэгийн нандин үдэш

Хоёрдугаар сарын 14-ний энэ өдөр “Ancore Conference event Venue” клубт дуучин Б.Баярцэцэг та бүхнийг урьжээ. Энэ үдэш дуучин бүсгүйн хайрын тухай өгүүлэх уянгалаг дуунууд эгшиглэхээс гадна азтай хосыг шалгаруулж, гэнэтийн бэлэг барих гэнэ. Мөн оргилуун дарс, амтат шоколад, гал улаан сарнай цэцэгс, жазз хөгжмийн хөнгөн аялгуу таныг хөглөх ажээ. Энэ үдэшлэг зөвхөн 35 хосд зориулагдсан гэдгийг санаад яаравчлаарай. Тасалбарын үнэ: 180.000 /2 хүн/  

Хайрын дууч С.Сэрчмаа ая дуугаа өргөнө

Дуучин С.Сэрчмааг сонсогчид нь “Хайрын дууч” гэж нэрлэдэг. Түүний хайрын тухай өгүүлэх үе үеийн дуунууд үргэлж хит болдог билээ. Тэгвэл энэ үдэш С.Сэрчмаа дуучин “Freezone” хамтлагийн дуучин Э.Энхтөртэй хамтарч “АСА” циркт “Turuu and Sally” тоглолтоо толилуулахад бэлэн болжээ. Энэ үдэш уран бүтээлчдийн хит дуунуудаас гадна шинэхэн уран бүтээл нь анх удаа сонсогчдод хүрэх юм байна. Тасалбарын үнэ: 20000, 30000, 40000  

Үнэнч хайрын бэлгэдэл “Ромео, Жульетта”

УДЭТ энэ үдэш хосуудад зориулж “Ромео, Жульетта” сонгодог жүжгийг толилуулахаар бэлджээ. Үнэнч хайрын бэлгэдэл болсон тус бүтээлд олон жилийн өс хонзон тээсэн хоёр гэр бүлийн хүүхдүүд бие биедээ дурласнаар өрнөдөг. Эцэст нь тэд өөрсдийн амиа егүүтгэж хайр сэтгэлээ тунхагладаг билээ. Жүжгийн найруулагчаар Төрийн соёрхолт Н.Наранбаатар ажилласан бол гол дүрийг Соёлын тэргүүний ажилтан Б.Шинэбаяр, залуу жүжигчин Т.Аннхзул нар бүтээх юм. Тасалбарын үнэ: 10000-30000   Эх сурвалж: www.polit.mn