Ч.ГАНТУЛГА Хосууд бие биедээ хайраа илчилж, сэтгэлээ илэрхийлдэг өдөр бол хоёрдугаар сарын 14 буюу гэгээн валентины баяр юм. Энэ өдөр хосууд хамтдаа дурсамж дүүрэн өдрийг өнгөрүүлж, хайр сэтгэлийн илэрхийлэл болсон зүрхэн шоколад солилцдог билээ. Тэгвэл дэлхийн өнцөг булан бүрт тэмдэглэдэг хамгийн романтик баяр хэрхэн бий болсон тухай бяцхан түүхийг сөхье. Ромын эзэнт гүрний үед Ромын хаадыг бурхан хэмээн мөргөдөг уламжлал тогтсон байжээ. Харин Клаудс хааны үед энэ үзэл бүрэн устсан юм. Түүний эзэнт гүрэнд Валентин гэсэн нэгэн лам амьдардаг байж. Тэрээр залуусыг нууцаар адислаж, гэрлэлтийг нь баталгаажуулдаг байв. Харин үүнийг нь мэдсэн хаан түүнийг шоронд хорих шийдвэр гаргажээ. Гэвч Валентин сэтгэлээр унасангүй. Харин ч хоригдлуудад ариун нандин хайр сэтгэлийн тухай өгүүлж, өөрийн итгэл үнэмшлийн тухай ярьсан байдаг. Энэ нь хоригдлуудаас эхлээд шоронгийн харгалзагч нарт ихэд таалагджээ. Тиймээс нэгэн харгалзагч түүнд охиноо танилцуулж хараатай болгож өгөхийг гуйжээ. Лам болон охины гуйлтыг бурхан сонсч, охинд орчлонг харах мэлмий заяасан гэдэг. Ийнхүү бүсгүй лам хоёр бие, биедээ сэтгэлтэй болсон тухай шуугиж, энэ яриа хааны чихэнд хүрэхэд хаан Валентиныг цаазлах тушаал гаргажээ. Түүний цаазлуулсан өдөр нь МЭ 269 оны хоёрдугаар сарын 14 байсан юм. Валентин энэ өдөр хамгийн сүүлчийн удаа хайртай бүсгүйдээ захидал бичжээ. Түүнийг цаазалсны дараа захидлыг нээхэд чин сэтгэлийн үгсийн дор “Валентинаас чинь...” хэмээн  гарын үсгээ зурсан байжээ. Энэ цагаас эхлэн дэлхий нийт энэ өдрийг гэгээн хайрын өдөр буюу Валентины баярыг тэмдэглэдэг болсон түүхтэй. Эх сурвалж: www.polit.mn