Б.Туул

Баянхонгор аймагт ажлаар явж байсан Ашигт малтмалын газрын  гурван ажилтан энэ сарын 24-нд сураггүй алга болсон гэдгийг бид  өмнө нь мэдээлсэн. Харин тэдний хоёр нь төөрч яваад олджээ.  Эх сурвалжийн мэдээлж байгаагаар долдугаар сарын 23-нд тэднийг Баянхонгор аймгийн Баян-Өндөр суманд Идрэнгийн нурууны орчимд явж байхад нь автомашиных нь гурван дугуй хагарчээ. Дугуйгаа янзлах гэж оролдсон боловч амжилтыг эс олж,  машинаа орхин явсан байна.  Тэдний ярьж буйгаар нэг мэргэжилтэн нь байрлал тогтоогчоор “Шинэжинст сум ойрхон байна” гэж хэлээд нөгөө хоёроосоо түрүүлж явсан гэнэ. Харин жолооч болон тасгийн дарга хоёр түүний араас нь явсан ч төөрч, шалбааг устай газар хоёр хоносны эцэст нутгийн малчинтай тааралдаж, энэ сарын 28-ны шөнө Баян-Өндөр сумын эмнэлэгт хүргэгджээ. Байрлал тогтоогчтой  түрүүлж явсан залуу нь өнөөдрийг хүртэл олдоогүй  байгаа аж.

Эмнэлэгт хүргэгдсэн хоёр хүний нэгийнх нь биеийн байдал хүндэвтэр байгаа бол тасгийн дарга нь эрлийн багийнхантай хамт мэргэжилтнээ хайж байгаа юм. Өчигдөр хотоос нисдэг тэрэгтэй эрлийн баг Баян-Өндөр суманд 17,40 минутын үед очиж, эрлийг агаараар үргэлжлүүлж эхэлжээ. Аймгийн онцгой байдлын хэлтсээс  зургаан мотоцикл, гурван машин болон 27 хүний бүрэлдэхүүнтэй эрлийн баг ажиллаж байгаа юм байна