С.УЯНГА

Нийгмийн даатгалын ерөнхий газрын дэргэдэх Эрүүл мэндийн даатгалын газрын хэлтсийн дарга Ц.Ганцэцэгээс даатгалын урамшууллын талаар тодрууллаа.

-Танай байгууллагаас даатгуулагчдыг урамшуулна гэсэн. Энэ талаар тодруулахгүй юу?

- Нийгмийн даатгалын үндэсний зөвлөлийн хурлаар шинэ журам баталсан. Өөрөөр хэлбэл эрүүл мэндийн даатгалын шимтгэлээ тогтмол төлсөн, дараалан гурван жил даатгалын сангаас эмнэлгийн тусламж, үйлчилгээний зардал гаргуулаагүй даатгуулагчийг эрүүл мэндийн үзлэгт нэг удаа хамруулна.  Даатгуулагч оношилгоо, шинжилгээний багц болон, үйлчлүүлэх эмнэлгээ өөрөө сонгон, харьяалал харгалзахгүйгээр үйлчлүүлэх боломжтой. Урамшууллын үйлчилгээ авах нэг хүний зардлыг 80 мянган төгрөгөөр тооцож энэ жилдээ 100 мянган хүнийг эрүүл мэндийн бүрэн үзлэгт хамруулна.

-Даатгалд хамрагдах хүмүүс ямар материал бүрдүүлж хаана хандах вэ?

-Иргэд нийгмийн даатгалын ерөнхий газрын ndaatgal.mn цахим хуудсаар орж нэр, регистрийн дугаараа оруулж шалгаад дээрх урамшуулалд хамрагдаж болох үгүйгээ мэдэж болно. Ерөнхийдөө гурван төрлийн багц байна. Иргэд ерөнхий бүх төрлийн шинжилгээгээ өгөөд дээр нь хавдрын болон харшлын шинжилгээний багцаас сонгож болно. Харин интернэтгүй газар байгаа иргэд аймаг дүүргийнхээ эрүүл мэндийн даатгалын хэлтэс дээр очоод урамшууллын эрхээ авна. Одоогоор хүмүүсийг үзлэгт хамруулах эмнэлэгүүдийг бүртгэж байна. Ирэх сарын 15-наас эмнэлэгүүдийн жагсаалт гарна.  

-Өмнө нь зөвхөн улсын эмнэлэгүүд хариуцдаг байсан. Энэ удаа хувийн эмнэлэг оролцох уу?

-Улсын эмнэлэгүүд ачаалалтай байдаг учраас энэ жил хувийн эмнэлэгүүд оролцохоор материалаа өгч байна.  Аль болох хүмүүст чанартай шуурхай үйлчлэх үүднээс матералаа өгсөн эмнэлэгүүдээс сонголт хийнэ. Ингээд ирэх сарын 15-наас урамшууллын аяныг албан ёсоор эхлүүлэхээр төлөвлөөд байна. Тухай бүрт нь хэвлэл мэдээлэл, албан ёсны цахим хуудсаараа дамжуулаад олон нийтэд мэдээлэл хүргэх болно.

 -Тоо хязгаартай юм байна. Урамшуулалд хамрагдаж чадаагүй хүмүүс ирэх жил хамрагдах боломжтой юу?

-НДЕГ урамшууллын үйлчилгээ авах нэг даатгуулагчийн тусламж үйлчилгээний зардлыг 80 мянган төгрөгөөр тооцож энэ онд болзол хангасан 100 мянга орчим хүнийг хамруулахаар болсон. Судалгаагаар болзол хангасан 330 гаруй мянган хүн байгаа юм билээ. Үүнээс төрөөс даадаг даатгуулагчдыг хасаад 100 орчим мянган хүн байгаа. Ингэж тооцоод найман тэрбум төгрөг төсөвлөсөн байгаа. Ирэх жил энэ ажил үргэлжилнэ.